ព្យញ្ជនៈខ្ជាក់ម្រឹគីម្រឹគា

ទស្សនាថ្ងៃនេះ: 31

បទកាកគតិ

សម្បតិ្តធម្មជាតិ	សម្បូរព្រោងព្រាត	ជាតិជាម្រឹគា
ម្រឹគីតូចធំ	ជុំក្នុងព្រឹក្សា	ព្រៃស្រុកសីមា
	ចាត់ជាជម្រក ។
ខ្លះរស់ផ្ទាល់ដី	ខ្លះទៀតចេះច្នៃ	ធ្វើសំបុកជ្រក
ខ្លះរស់ក្នុងរន្ធ	ខ្លះអន់ស្មោកគ្រោក	ខ្លះចេះលៃលក
	រស់យ៉ាងសង្ហា ។
ខ្ញុំសូមរៀបរាប់	រើសយកមកភ្ជាប់	ជាប់តួអក្ខរា
ចារឆ្លាក់ខ្ជាក់ឈ្មោះ	អស់សព្វម្រឹគា	ម្រឹគីនានា^១
	ទាំងស្រុកព្រៃភ្នំ ។
ក មានក្របី	ឈ្លូសប្រើសក្តាន់ក្តី	ក្នុងព្រៃតូចធំ
កែសកាំប្រម៉ា	ត្រាទុកមួយដុំ	ក្រុមនេះមិនចំ
	ម្រឹគីម្រឹគា ។
ខ មានខ្លាធំ	ខ្លាតូចខ្លាឃ្មុំ	ខ្លាមាសលឿងផ្កា
ខ្លាត្រីរខិន	ដំបងផងណា	ខ្លាភ្ញីថ្មដា
	ខ្លាខ្លោងខ្ទីងផង ។
គ មានគោព្រៃ	គោស្រុកគោថ្លៃ	គោក្តាមគោខ្យង
គោកាត់គោបា	គោស្រង៉ែផង	គោឆ្មាត់គោគ្រោង
	គោចំការស្រែ ។
ឃ ឃើញតែឃ្មុំ	ស្រុកស្រែព្រៃភ្នំ	តូចធំហូរហែ
តែមិនមែនម្រឹគ	យប់ព្រឹកច្នៃកែ	ធ្វើឱសថខ្មែរ
	ពូកែអស្ចារ្យ ។
ង ងងឹតឈឹង	មិនមានដំណឹង	ដឹងនៅទីណា
ស្វះស្វែងរកដែរ	តែគ្មានសញ្ញា	ឬមួយមរណា
	ផុតពូជសូន្យឈឹង ។
ច មានចចក	ចង្ហិតចង្ហក	ចចកស្ទឹងបឹង
ចចកព្រៃភ្នំ	យប់យំរហឹង	ចុកជូក្រឡឹង
	ចាប់សត្វហែកស៊ី ។
ឆ មានឆ្កែឆ្មា	ឆ្កែព្រៃឆ្មាបា	ឆ្មាដាវឆ្មាញី
ឆ្មាទឹកឆ្មាគោក	ឆ្លកឆ្ការឆ្មារី	ឆ្មាសម្បុរពីរ
	ចាញ់សម្បុរបី ។
ជ មានជ្រូកស្រុក	ជ្រូកព្រៃជ្រៅស្តុក	ជ្រូកគោកទឹកក្តី
ជ្រូកព្រោនជ្រូកប្រែង	ជ្រូកបាសាឡី	ហៃណាំខ្លួនខ្លី
	ជៀសជាំចុចពណ៌ ។
ឈ មានឈ្លូសព្រៃ	ឈ្លូសយក្សធំក្រៃ	សព្វថ្ងៃក្រីក្រ
ឈ្មុសស្បូវឈ្មុសប្រែង	ឈ្មុសទេសទឹកល្អ	អប់ក្លិនបវរ
	ល្អល្អះឥតទាស់ ។
ញ មានរញី	ស្តាប់ដោយសំភី	មិនទំនងសោះ
ព្រោះមានលោក-រ	ឈរដើមបង្អស់	តែរញីនោះ
	ថ្នាំផ្លោះពូកែ ។
ដ មានដំរី	ដេរដាសពេញដី	ស្រុកព្រៃហូរហែ
តែឥឡូវក្រ	កម្រឃើញដែរ	ព្រោះព្រានភ្លុកចែ
	ប្រល័យច្នៃផល ។
ឋ ឋិតឋានឆ្ងាយ	ហួសហារបរិយាយ	រាយរាប់ប្រាប់ដល់
បងប្អូនញាតិមិត្រ	ឱ្យផុតចម្ងល់	ទាស់តែត្រង់ទាល់
	មិនស្គាល់ថាបាន ។
ឌ ដូចតែគ្នា	សួរសព្វដូនតា	សាច់សាសន្តាន
សួរសព្វកន្លែង	ស្វែងដឹងដើមដាន	បានត្រឹមខកខាន
	មិនបានដូចប៉ង ។
ឍ មាន ឍាមរា	បាលីភាសា	លោកប្រែថាហង្ស
មិនមែនម្រឹគទេ	សូមមេត្តាផង	នេះគ្រាន់ចងក្រង
	សោះតែនឹងខាន ។
ណ មានណូរី	មិនត្រូវពេញទី	ម្រឹគីតិច្ឆាន
ព្រោះជាបក្សី	ស្តីសោះតែខាន	សូមញាតិសន្តាន
	ប្រោសប្រាណខន្តី ។
ត មានតោសិង្ហ	តែសព្វថ្ងៃហ្នឹង	ស្រុកយើងក្រក្រី
នៅសល់តិចតួច	រួចពីប្រល័យ	នៃព្រានអប្រិយ
	ប្រល័យគ្មានស្តាយ ។
ថ ថាមិនត្រូវ	សួរសព្វម៉ែឳ	ញាតិមិត្តជិតឆ្ងាយ
មិនមានចម្លើយ	ឆ្លើយឆ្លងបរិយាយ	សូមញាតិទាំងឡាយ
	អភ័យទោសផង ។
ទ មានទន្សាយ	ទន្សោងទាំងឡាយ	ទ្រាយទោចទន្សង
ទន្សាយមានច្រើន	ស្លឹកផងគល់ផង	ទ្រាយទោចត្រសង
	ត្រសុលរុលព្រៃ ។
ធ ធីបសិនចុះ	សូមញាតិស្រីប្រុស	សន្តោសប្រណី
ចាំពេលរកឃើញ	ខ្មុំនឹងលកលៃ	ចារជូនជាថ្មី
	ដោយក្តីជ្រះថ្លា ។
ន ឃើញតែនាគ	តែសូមបញ្ជាក់	នាគណូ^២ម្រឹគា
នាគនោះជាល្មូន	មានរឹទ្ធិ៍ខ្លាំងក្លា	មិនមែនម្រឹគា
	ម្រឹគីនោះឡើយ ។
ប មានប្រើសព្រៃ	ប្រើសស្បូវក្រក្រៃ	ក្ស័យស្ទើរអស់ហើយ
ព្រោះព្រានអប្រិយ	ប្រល័យឥតស្បើយ	សូមបងប្អូនអើយ
	ជួយថែរក្សា ។
ផ មានផ្សោតទឹក	សណ្ឋានគួរភ្លឹក	នឹកគួរអនិច្ចា
ស្រដៀងនឹងមនុស្ស	ឈ្មោះជាមច្ឆា	មិនមែនម្រឹគា
	សូមញាតិប្រណី ។
ព មានពពែ	ពង្រូលមូរខ្វេរ	ពេលប៉ះពាល់អ្វី
ដើម្បីការពារ	គ្រាមានគ្រោះភ័យ	ពង្រូលលកលៃ
	ច្នៃឥតភ្លេចភ្លឹក ។
ភ មានតែភេ	មុជហែលហូរហែ	ហើបក្បែរមាត់ទឹក
មិនថាយប់ថ្ងៃ	ឬក៏ល្ងាចព្រឹក	មិនស្រពន់ស្ពឹក
	ជួនទឹកជួនគោក ។
ម មានរមាំង	រមាសកុយដាំង	ស្រដៀងនឹងជ្រូក
តែមានដុះកុយ	ឆ្ងុយនៅពីមុខ	ពោះធំទ្រយុក
	ស្បែកគ្រើមក្រាសក្រៃ ។
យ យក្ខយឹតអស់	មិនមានសល់សោះ	ព្រោះយក្ខអប្រិយ
យឹតមិនមើលមុខ	យឹតយកឈ្នះដៃ	យឹតសព្វយប់ថ្ងៃ
	យឹតឥតប្រណី ។
រ មានរញី	រមាសពាសទី	រមាំងរាជសី
ឥឡូវរាវរោយ	សូមញាតិប្រុសស្រី	មេត្តាប្រណី
	ជួយថែរក្សា ។
ល ឮមានលា	គេប្រើពួកវា	គួរឱ្យអនិច្ចា
ដឹកអូសទំនិញ	ពេញលើបិដ្ឋា	កម្រមួយណា
	បានរួចខ្លួនឡើយ ។
វ ដូចជាវាក់	វីរវរគេទាក់	វាវាត់អស់ហើយ
បានជាវង្វេង	ព្រាត់កោះព្រាត់ត្រើយ	រកមិនឃើញឡើយ
	ឬមួយមិនមាន ។
ស មានសត្វសេះ	សំពោចស្វាក្រិស	ស្វាព្រាហ្មណ៍ស្វាហ៊ាន
សិង្ហតោរាជសីហ	ព្រៃស្រុកក៏មាន	ស្វារាប់សិបលាន
	មានសព្វទីឋាន ។
ហ ហាក់ហិនអស់	នឹកគួរស្រណោះ	ដល់រឿងបុរាណ
ព្រះរាមព្រះលក្ខណ៍	សេដាកល្យាណ	មានហនុមាន
	ក្លាហានចំណាប់ ។
ឡ មិនមានឡើយ	សួរសព្វឋានហើយ	ចម្លើយឆ្លើយប្រាប់
ថាមិនដែលឮ	មានរស់ឬស្លាប់	ឬមានក្នុងច្បាប់
	ក្បួនណាមួយសោះ ។
អ ឮមានអូត	អង់អាចរហូត	តែដូចចន្លោះ
នៅក្នុងស្រុកយើង	មិនដែលឃើញសោះ	បានឮត្រឹមឈ្មោះ
	រស់ដល់សព្វថ្ងៃ ។
រៀបរាប់ម្រឹគា	រាយតាមអក្ខរា	ចារជូនខ្លីៗ
បើមានខុសឆ្គង	សូមទានប្រណី	សូមចប់សេចក្តី
	ប៉ុណ្ណេះឯងហោង ៕