រៀនព្យញ្ជនៈ៣៣តួ

ចំនួនទស្សនា: 167

បង្ហោះដោយ:

Johnny ចន្នី

នត្ថិ សន្តិ បរំ សុខំ
សុខដទៃក្រៅពីសេចក្តីស្ងប់ពុំមានឡើយ។

🔸តិះដៀលខ្លួនឯងដោយហេតុណា មិនគួរធើ្វហេតុនោះឡើយ។

បទពាក្យប្រាំពីរ

ខ្មែរមានព្យញ្ជនៈស្រៈនព្វន្ត	ខ្មែរគួរគយគន់រត់រករៀន
រូតរះស្វះស្វែងកុំអៀនប្រៀន	សិល្បៈរបៀនស្ពានបញ្ញា ។
រៀន រាប់រៀនអានរៀនសរសេរ	រៀន កុំទំនេររៀនឧស្សាហ៍
រៀន លេខនព្វន្តគុណគណនា	រៀន ស្រៈអក្ខរាចារសេចក្តី ។
រៀន រាប់ ក ខ ស្រៈ អ អា	រៀន ថាសរសេរឃ្លាវែងខ្លី
រៀន មានគំនិតគិតកែច្នៃ	រៀន រកសេចក្តីឱ្យផូរផង់ ។
រៀន ក រៀនកាន់កាប់កិច្ចការ	រៀន កុំឫស្យាកោងដូចកង់
រៀន កួចគំនិតគិតត្រឹមត្រង់	រៀន កុំកន្លងក្បួនតម្រា ។
រៀន ខ រៀនខំសន្សំល្អ	រៀន ខិតជិតធម៌បានសុខា
រៀន កុំខិលខូចដូចសត្វស្វា	រៀន ខុសតម្រានាំខូចខួរ ។
រៀន គ រៀនគេងគងគិតគូរ	រៀន គាប់គុណគ្រូឱ្យបានគួរ
រៀន កុំគុំគួនគិតហ្មងមួរ	រៀន គង់គាប់គួរបានគប្បី ។
រៀន ឃ រៀនឃាត់ចិត្តឃោរឃៅ	រៀន ឃើញខុសត្រូវផ្លូវចាស់ថ្មី
រៀន កុំឃុបឃិតឃាតអប្រិយ	រៀន ឃុំសិរីកុំបីឃ្លាត ។
រៀន ង រៀនងើបកុំងងោះ	រៀន ងុយស្អុយឈ្មោះរស់ដូចងៀត
រៀន ងារឱ្យងំកុំចង្អៀត	រៀន ងោកចោលម្សៀតដូចងងឹត។
រៀន ច រៀនចេះចាប់ចាត់ចែង	រៀន ចេះកោតក្រែងកុំតាមចិត្ត
រៀន ចេះចរចាថ្លាថ្លែងពិត	រៀន ចូរចេះគិតជួយចែកចាយ
រៀន ឆ រៀនឆន្ទកុំឆេវឆាវ	រៀន ឆាំងឆោតខ្លៅកុំឆើតឆាយ
រៀន កុំឆាឆៅមិត្តជិតឆ្ងាយ	រៀន ឆួលឆេះកាយក្លាយប្រេះឆា ។
រៀន ជ រៀនជួយប្រទេសជាតិ	រៀន ជាកុំឃ្លាតជាតិថ្លៃថ្លា
រៀន កុំជិះជាន់ជាតិសាសនា	រៀនជួយផ្សះផ្សាជាតិជោគជ័យ
រៀន ឈ រៀនឈប់បង្ហូរឈាម	រៀន ឈោងយកនាមពិរោះល្បី
រៀន ឈានទៅមុខឱ្យឃ្មាតខ្មី	រៀន ឈរលើដីកុំឈូឆរ ។
រៀន ញ រៀនញត្តិកុំញុះញង់	រៀន ញាក់អ្នកឆ្គងកុំញីញ័រ
រៀន ញ៉ាំងញញឹមប្រិមប្រិយល្អ	រៀន ញៀនស្មោះសឱ្យញឹកញាប់។
រៀន ដ រៀនដេកដើរដឹងដាន	រៀន ដឹងប្រមាណបានដល់ដប់
រៀន ដាំដោះដូរគួរប្រសប់	រៀន ដុសទម្លាប់ឱ្យឧត្តម ។
រៀន ឋ រៀនឋិតក្នុងឋានសុខ	រៀន ថែម៉ែពុកជាបឋម
រៀន ថែមកុំថយឱ្យស័ក្តិសម	រៀន ថាបន្លំបាត់សួគ៌ឋាន ។
រៀន ឌ រៀន ឌុនកុំឌឺដង	រៀន កុំចងក្រងប្រឌិតដាន
រៀន ដូចដូនតាពីបូរាណ	រៀន កុំហួសដានលំអានថ្នាក់ ។
រៀន ឍ រៀនធន់ទុនវុឌ្ឍី	រៀន ធម៌សាមគ្គីម្នីកុំអាក់
រៀន ធម៌នាំធូរឧបសគ្គ	រៀន ធន់ថ្នាំងថ្នាក់ជាក់ជោគជ័យ។
រៀន ណ រៀនណែនាំអ្នកណាស់	រៀន នាំឱ្យច្បាស់ណា៎! ចរណៃ
រៀន ឱ្យណែនណាន់តាន់សេចក្តី	រៀន ហ្នឹងមានន័យនឹងចំណាន ។
រៀន ត រៀនតបគុណម៉ែឪ	រៀន តាមផ្លូវត្រូវកុំតឹងតាន
រៀន តោងតាមច្បាប់ឆាប់នាំប្រាណ	រៀន ដល់ត្រើយត្រាណបានសុខា។
រៀន ថ រៀនថែកេរ្តិ៍ម៉ែពុក	រៀន ថាំចាំទុកថង់ថវិកា
រៀន ថែមកុំថយតាមគេថា	រៀន ថួនរក្សាកេរទ្រព្យា ។
រៀន ទ រៀនទប់ទល់ទុក្ខទោស	រៀន ទាញត្រូវខុសកុំទាស់គ្នា
រៀន ទេទោរទៅតាមមាគ៌ា	រៀន ទន់ឫក្សពារតាមទំនង ។
រៀន ធ រៀនធ្វើមើល៍ធនធាន	រៀន ធម៌យកឈានស្ពានគន្លង
រៀន ធំកុំធុញធៀបអ្នកឆ្គង	រៀន ធន់ម៉ត់ហ្មងពិតប្រពៃ ។
រៀន ន រៀននៅឱ្យនឹងនួន	រៀន នីតិ៍នាំខ្លួនឱ្យមានន័យ
រៀន នឹកនាគុណអ្នកដទៃ	រៀន នោះនឹងថ្លៃថ្លាអាត្មា ។
រៀន ប រៀនបទកុំបែកបែរ	រៀន បែបបទខ្មែរកេរមេបា
រៀន បង់បៀតបៀនបាបប្ញស្យា	រៀន បានថ្លៃថ្លាកុំរបេះ ។
រៀន ផ រៀនផាតិភោគផលផុស	រៀន ផឹកចាំចុះជាក់មិនផេះ
រៀន ផិតភូតភរផាយដូចសេះ	រៀន ផុងតម្រេះផុតភក្តី ។
រៀន ព រៀនពោលពាក្យពេចន៍ពិត	រៀន ពត់ពាតចិត្តពេញប្រពៃ
រៀន កុំពិសពុលពាលអប្រិយ	រៀន ពន្ទអ្នកថ្លៃនៃជីវិត ។
រៀន ភ រៀនភាណកុំភូតភរ	រៀន ភាន់វឹកវរនាំភ័យភិត
រៀន ភូតច្រើនភប់ជួបអមិត្ត	រៀន ភរភូតពិតស្វិតអង្គា ។
រៀន ម រៀនមើលឱ្យមុតមាំ	រៀន មន្តនឹងនាំផុតវេរា
រៀន មានមេត្តាផ្សះផ្សាគ្នា	រៀន កុំដូចមារមោហ៍ដាសមីរ ។
រៀន យ រៀនយឹតយោងអ្នកយ៉ាប់	រៀន យល់គល់ច្បាប់កុំយាយី
រៀន យកយោគយល់មកសំភី	រៀន យល់នាទីយើងគេផង ។
រៀន រ រៀនរស់យសរុងរឿង	រៀន រស់ថ្កុំថ្កើងរួចមួរហ្មង
រៀន រូតរួសរាន់មិនរេរង់	រៀន រៀបប្ញកផងឱ្យរួសរាយ ។
រៀន ល រៀនលះចិត្តលោភលន់	រៀន លួចលូកលាន់ជួនរលាយ
រៀន លេងលីលាលង់អន្តរាយ	រៀន លត់ពត់កាយលឿនលូតលាស់។
រៀន វ រៀនវាងរឿងវិវាទ	រៀន វៀរចោលម្សៀតវាតឱ្យអស់
រៀន កុំវង្វេងវក់នឹងឈ្លោះ	រៀន វត្តខ្ពង់ខ្ពស់យសវិវឌ្ឍន៍ ។
រៀន ស រៀនស៊ូសូត្រសិក្សា	រៀន សព្វសញ្ញាសូន្យកំសត់
រៀន សាងសុខសាន្តលំអានរតន៍	រៀន សន្សំបទផ្លូវសួគ៌ា ។
រៀន ហ រៀនហាត់ឆ្លាតហំហួន	រៀន ហាមប្រាមខ្លួនកុំហូរហៀរ
រៀន កុំហ៊ឺហាហាច់លេលា	រៀន ហែកហួរគ្នាហូរហួតអស់ ។
រៀន ឡ រៀនឡើងកុំឡិកឡក់	រៀន កុំតក់ម៉ក់ប្ញកឡេះឡោះ
រៀន កុំឡូឡាឡូយឱ្យសោះ	រៀន កុំឡេះឡោះមិនល្អឡើយ ។
រៀន អ រៀនអត្ថឱ្យអង់អាច	រៀន ឱនឱ្យប្រាជ្ញ ណា៎អង្គអើយ
រៀន ឱ្យអស់អត្ថអង្គនឹងស្បើយ	រៀន ហើយអង្គអើយកុំអួតអាង។
ក ខ គ ឃ ង ឈរត្រៀប	ឈររៀបជាខ្នាតស្អាតផូរផង់
ស្វាគមន៍អ្នករៀនដោយស្មោះត្រង់	តម្រង់ទិសដៅទៅរកល្អ ។
ក ខ គ ឃ ង ខ្សឹបថា	បើលោកអ្នកណាចង់បវរ
ត្រូវខំរៀនសូត្រដោយស្មោះស	ផលល្អនឹងមានមកមិនខាន ។
អ្នករៀនឱហាតឆ្លាតប្រសប់	នឹងបានកំណប់គាប់ជាប់ប្រាណ
កំណប់បញ្ញាថ្លាថ្កើងថ្កាន	ប្រៀបបានពន្លឺភ្លឺយប់ថ្ងៃ ។
បូរាណលោកបានធ្វើប្រៀបធៀប	ទុកដូចប្រទីបភ្លឺថ្លាក្រៃ
លើសអស់ពន្លឺភ្លឺដទៃ	ភ្លឺអ្វីមិនស្មើមានបញ្ញា ។
ម្យ៉ាងទៀតលោកឆ្លៀតផ្តាំទូន្មាន	ថាចេះពីរៀនមានទ្រព្យា
បញ្ញាទ្រព្យកើតដ្បិតឧស្សាហ៍	ព្យាយាមខ្លាំងក្លាសាងសន្សំ ។
ច្នេះហើយខ្ញុំក៏រៀនតាក់តែង	រៀបរាប់ថ្លាថ្លែងតែងផ្សែផ្សំ
រាវរកសេចក្តីន័យស័ក្តិសម	ប្រៀបធៀបឬចំផ្សំតាមក្បួន ។
ទុកអានកំដរពេលសម្រាក	បំបាត់តោកយ៉ាកចាកពីខ្លួន
ពង្រឹងស្មារតីឱ្យមាំមួន	តាមក្បួនកំណាព្យកាព្យអាចជួយ។
របៀបតែងកាព្យរាប់ព្យញ្ជនៈ	មួយវគ្គមួយវគ្គមានន័យមួយ
គ្រាន់បានអានលេងគេងមិនព្រួយ	ទុកជាជំនួយស្មារតី ហោង ៕