About Us 2021-2022

វត្តខេមររតនារាម (អារាមជាដួងកែវរបស់ខ្មែរ) មានទីតាំងភូមិសាស្ត្រស្ថិតនៅនាដងផ្លូវលេខ៖ ៤៧ ទីក្រុង សាន់ ឌីអេហ្គោ រដ្ឋកាលីហ្វ័រនីញ៉ា សហរដ្ឋអាមេរិក ដូចមានអាស័យដ្ឋានខាងក្រោមនេះ៖
3606 47th Street, San Diego, CA 92105-3502 ។

វត្តនេះបានចាប់បដិសន្ធិឡើង នៅថ្ងៃទី៥ ខែមករា ឆ្នាំ១៩៨២ និង បានទទួលការអនុញ្ញាតជាផ្លូវការ ចុះទីថ្ងៃ២៥ ខែវិច្ឆិកា ឆ្នាំ១៩៨៣ ពីសាលាក្រុង ទីក្រុងសាន់ ឌីអេហ្គោ រដ្ឋកាលីហ្វ័រនីញ៉ា សហរដ្ឋអាមេរិក ។ វត្តនេះកកើតឡើងដោយ សារកម្លាំងសទ្ធាជ្រះថ្លាដ៏បរិសុទ្ធិមុតមាំ និង ដោយសារកម្លាំងសាមគ្គីដ៏ខ្លាំងក្លា របស់ពុទ្ធបរិស័ទគ្រប់ទិសទី ចូលរួមជួយ ឧបត្ថម្ភទំនុកបំរុងសព្វបែបយ៉ាង ធ្វើឱ្យវត្តនេះបានប្រកបដោយវឌ្ឍនភាពរីកចម្រើនលូតលាស់ដុះដាលជាលំដាប់លំដោយ រហូតមកដល់សព្វថ្ងៃ ។

វត្តខេមររតនារាម គឺជាវត្តមួយដែលមានពុទ្ធបរិស័ទយ៉ាងច្រើនកុះករ មានសទ្ធាជ្រះថ្លាគោរពបូជា ក្នុងការធ្វើ បុណ្យសុន្ទរ៍ទានផ្សេងៗទៅតាមប្រពៃណីជាតិខ្មែរយើង ដែលជាអ្នកគោរពប្រតិបត្តិកាន់តាមព្រះពុទ្ធសាសនា ។ ព្រោះហេតុ ដូច្នេះហើយ បានជាវត្តនេះទទួលបាននូវការគាំទ្រគោរពបូជា ពីសំណាក់ទឹកចិត្ត-ទឹកសទ្ធា របស់ពុទ្ធបរិស័ទគ្រប់ទិសទី មិនថាឆ្ងាយឬជិតឡើយ បាននាំគ្នាមកគោរពបូជាធ្វើបុណ្យសុន្ទរ៍ទាន ប្រកបដោយទឹកចិត្ត-ទឹកសទ្ធាជ្រះថ្លា និង សប្បាយ រីករាយយ៉ាងច្រើនកុះករជាទីបំផុត តាំងពីដើមរហូតមកដល់សព្វថ្ងៃនេះ ។

លក្ខណៈល្អប្រសើរទាំងអស់នេះ គឺដោយសារសេចក្តីល្អ និង ភាពវៃឆ្លាតរបស់ព្រះសង្ឃ អាចារ្យ និង គណៈកម្មការ ពុទ្ធិកសមាគម ព្រមទាំងញាតិញោមពុទ្ធបរិស័ទជិតឆ្ងាយគ្រប់ទិសទី មានការសាមគ្គីគ្នា ស្រឡាញ់រាប់អានគ្នា ចេះស្គាល់ ចិត្ត ស្គាល់ថ្លើមគ្នា និង មានសេចក្តីមេត្តាយោគយល់ផ្តល់ភាពងាយស្រួលដល់គ្នានឹងគ្នាបានជា វត្តខេមររតនារាម មានលក្ខណៈល្អប្រសើររហូតមកដល់សព្វថ្ងៃ ។

សព្វថ្ងៃវត្តនេះ បាននិងកំពុងប្រព្រឹត្តទៅយ៉ាងរលូនប្រកបដោយលក្ខណៈល្អប្រសើរ និង ប្រកបដោយសេចក្តីសុខ ស្ងប់ក្សេមក្សាន្ត ក្រោមម្លប់បារមីនៃព្រះធម៌វិន័យ ដែលជាត្រីវិស័យដ៏មានប្រសិទ្ធិភាពបំផុត ក្នុងការជួយចង្អុលគោលដៅ នៃការធ្វើដំណើរឆ្ពោះទៅកាន់កោះត្រើយនៃសេចក្តីសុខសន្តិភាព ដ៏ត្រជាក់ត្រជុំរហូតមក ។

ជាពិសេសគឺ វត្តខេមររតនារាម មានរចនាសម្ព័ន្ធគ្រប់គ្រងនិងដឹកនាំទៅតាមលក្ខណៈ ប្រពៃណីទំនៀមទម្លាប់ ផង ទៅតាមគន្លងព្រះធម៌វិន័យរបស់ព្រះពុទ្ធសាសនាផង និង ទៅតាមលក្ខន្តិកៈច្បាប់ (Bylaws) របស់ពុទ្ធិកសមាគមខ្មែរ ផង ។ សមាសភាពគណៈកម្មការគ្រប់គ្រង់ដឹកនាំរបស់ពុទ្ធិកសមាគមខ្មែរ វត្តខេមររតនារាម គឺប្រព្រឹត្តទៅតាមរយៈ សម្លេងនៃសន្លឹកឆ្នោត របស់សមាជិកសមាជិកាសកម្មបោះឆ្នោតជូន ទៅតាមពេលកំណត់ជារៀងរាល់ឆ្នាំក្នុង១អាណត្តិម្តង ទើបអាចក្លាយទៅជាគណៈកម្មការពុទ្ធិកសមាគមខ្មែរ ត្រឹមត្រូវស្របទៅតាមលក្ខន្តិកៈច្បាប់របស់ពុទ្ធិកសមាគមខ្មែរ ដែល កំពុងធរមាននៅសព្វថ្ងៃនេះ ។