ព្យញ្ជនៈខ្ជាក់ព្រៃព្រឹក្សា

ចំនួនទស្សនា: 68

បង្ហោះដោយ:

Johnny ចន្នី

នត្ថិ សន្តិ បរំ សុខំ
សុខដទៃក្រៅពីសេចក្តីស្ងប់ពុំមានឡើយ។

🔸គួរធើ្វនូវបុណ្យទាំងឡាយ ដែលនាំសេចក្ដីសុខមកឲ្យ។

បទកាកគតិ

សម្បតិ្តធម្មជាតិ	សម្បូរព្រោងព្រាត	ជាតិជារុក្ខា
ខ្លះតូចខ្លះធំ	ជុំជាព្រឹក្សា	ខ្លះជាលតា
	ផ្លែផ្កាឱ្យផល ។
ខ្លះដុះក្នុងស្រុក	រាប់រាយរយមុខ	ទុកជាសម្គាល់
ខ្លះដុះខ្លួនឯង	ខ្លះដាំយកផល	ខ្លះទៀតជួយផ្តល់
	ផលតាមត្រូវការ ។
ខ្ញុំសូមរៀបរាប់	រើសរកមកភ្ជាប់	ជាប់តួអក្ខរា
ចារឆ្លាក់ខ្ជាក់ឈ្មោះ	អស់សព្វរុក្ខា	រួមជាព្រឹក្សា
	ចែកជូនសន្តាន ។
ក មានក្រសាំង	ក្រូចក្រាយបាយក្តាំង	ក្រញូងកំញ៉ាន
កកោះកៅស៊ូ	ជម្ពូបែកចាន	ក្រឡាញ់ហៃសាន
	ក្រវ៉ាន់ក្តាំងងា ។
ខ មានខ្វិតខ្វង	ខ្លុងខ្លូតខ្លែងគង់	ខ្វែងខ្វាវបន្លារ
ខ្នុរស្រុកខ្នុរព្រៃ	ខ្នាយមាន់ខាន់ម៉ា	ខ្លាញ់ក្តាមខាត់ណា
	ខ្លែងពណ៌ខ្ទរដី ។
គ មានគគី	គគិតគោញី	គុយគូលេនព្រៃ
គ្រៀលគ្រើលគូទស្លា	គ្រាប់បែកចេកខ្ចី	គ្រុងទេសទល់ដី
	គ្រុងវាលគង្គា ។
ឃ មានដើមឃ្មាស	ពណ៌ខ្មៅសាច់ក្រាស់	ខ្មាស់អស់ព្រឹក្សា
ឃ្មត់ឃ្មេឃ្លេឃ្លៃ	ដឹងពីយាយតា	ឃ្លោកក្លែងកាយា
	ក្លាយជាបន្លែ ។
ង មានដើមងប់	បេះបោចមិនឈប់	ជាប់ជាហូរហែ
យកមកស្លស្លុក	បុកជាបន្លែ	បង់សម្លខ្មែរ
	កែប្រែរសជាតិ ។
ច មានចំប៉ា	ចំប៉ីចេកចារ	ចាន់ចែងច្រនៀង
ច្រេសច្រត់ឥសី	ចំបក់ជ្រកភ្លៀង	ចន្ធូផ្កាផ្អៀង
	ចន្ទល់ភ្នំទប់ ។
ឆ មានឆាំឆា	ឆ្កែស្រែងឆ្មាបា	ឆ័ត្ររួតត្រួតម្លប់
ឆ្មាទឹកឆ្តោទន់	ឆ្អឹងពស់គ្រោះជប់	ឆ្កែងឆ្វែសឆ្មាយប់
	ឆ្នុកទ្រូឆ្នុកត្មាត ។
ជ មានជម្ពូ	ជាយស្បៃជើងគោ	ជក់ជ័របាញ់បាត
ជ័យភ្លាជញ្ជាំង	ជន្លង់ជន្លាត់	ជណ្តើរស្វាស្អាត
	ជ្រៃក្រឹមជើងចាប ។
ឈ មានឈើទាល	ឈើខ្មៅឈើត្បាល	ឈើកែវរាំងសាប
ឈើអែមឈាមមាន់	ឈាមអន្ទង់ច្រាប	ឈ្លីកពកនាងទាប
	ឈើទាលទិព្វទឹក ។
ញ មានញស្រុក	ញព្រៃជ្រៅស្តុក	ញក្លាយញទឹក
ញស្បាតញធំ	ញិញយំរីកព្រឹក	ញិញបាតស្អាតស្លឹក
	ញ៉ាំញឹកខ្មៅធ្មេញ ។
ដ មានដក់ចាន់	ដកដាវក្រវ៉ាន់	ដួងចែមប្រផេញ
ដង្កោដង្កៀប	ក្តាមក្តុលដូងម្តេញ	ដក-ព-ពឹសចេញ
	ដង្ហិតដីប្លី ។
ឋ ឋិតឆ្ងាយឋាន	រកថាមិនបាន	ស្មានមិនត្រូវអី
ស្វែងរកមិនឃើញ	សូមទានអភ័យ	ជួយចាត់លកលៃ
	ចែកជូនញាតិសា ។
ឌ មានឌាឌិម	ខ្លះហៅឌាលិម	សំស្ក្រឹតភាសា
ប្រែជាសម្រាយ	ទទឹមផលា	រសឆ្ងាញ់ពិសា
	មានគុណភាពល្អ ។
ឍ ធីបទុកចុះ	គ្មានមួយដើមសោះ	ឈ្មោះហៅថាក្រ
សូមញាតិប្រុសស្រី	ជួយរកបន្ត	បើមានផលល្អ
	មេត្តាប្រណី ។
ណ មានណាគ្រី	ល្អល្អះសោភី	ប្រៀបនារីស្រី
អប់ក្លិនក្រអូប	យប់យន់សម័យ	ឆ្លងផុតរាត្រី
	ក្លាយជាអស់ក្លិន ។
ត មានត្រាចត្បែង	តាត្រៅត្នោតត្រែង	តៅតែងត្បាល់កិន
ត្រមូងត្រសេក	ត្រយឹងថ្នាំចិន	ត្របែកចែកក្លិន
	ត្រយឹងត្រយ៉ង់ ។
ថ មានថ្កូវថ្ងាន់	ថ្លនថ្មចង្ក្រាន	ថ្នាំងថ្នាងអង្ក្រង
ថ្នាំថ្នឹងថ្ពាល់ត្រី	ថ្លាញថ្លើមទឹកផង	ថ្មទាប់រាប់ថ្មង
	ថ្នក់ទឹកថ្លឹកថ្លែន ។
ទ មានទន្សែ	ទន្លាប់ហូបផ្លែ	ទទឹមទុរេន
ទឹកដោះទៀបទៀន	ទ្រៀកទ្រាំងគូលេន	ទំពាំងពុំសែន
	ទ្រៀលទ្រលឹងទឹង ។
ធ មានធ្លកធ្លាយ	ធ្នង់ធ្នាស់ឈ្នះក្រាយ	ធ្មេញត្រីត្រយឹង
ធ្មៃព្រៃធ្មាទឹក	នឹកដល់កំភ្លឹង	កំភ្លងសាច់រឹង
	ជាងកំភ្លៅនាង ។
ន មាននាងនួន	នាងខ្មៅហំហួន	នួនស្រីច្រនៀង
នាងសនាងដែង	នាងធំចង្គ្រាង	នាងផ្អែកចំហៀង
	នាងនិលពិសី ។
ប មានបាយក្តាំង	បាយក្រៀមភូវំាង	បាយម៉ាតប្រម៉ាត់ដី
បាយកកបាយទា	បង្កែវដំរី	បូព្រឹកស្លឹកបី
	បេងបាសប្រោះស្វា ។
ផ មានផ្តៅផ្ចឹក	ផ្តៅត្រែសផ្តៅទឹក	ផ្តៅសោមផ្តៅស្វា
ផ្តៀកផ្តៅផ្អាវផ្អុង	ផ្លុងផ្លាងផ្លែផ្កា	ផ្ទុះផ្ទីបន្លា
	ផ្កាយព្រឹកផ្កាត្រែ ។
ព មានពង្រ	ព្រូសពពូលថ្ម	ពួចពពាលខែ
ពពេលពាលពេច	ពុទ្រាហូបផ្លែ	ព្រិចព្រាលវេញខ្សែ
	ព្រហ៊ូតព្រីងព្រុម ។
ភ មានភ្នំភ្នែង	ភ្នែកមាន់ឆ្កែស្រែង	ភ្លៅនាងក្រមុំ
ភ្លៅមាន់ភ្នែកព្រាប	ភ្លូតូចភ្លូធំ	ភ្លូបាតភ្លូភ្នំ
	ភ្លូភ្លុកភ្លងក្អែក ។
ម មានម៉ាក់ប្រាង	ម៉ាក់ប្រេងផ្អែមខ្លាំង	ម្ទេសខ្មាំងទឹកភ្នែក
មង្ឃុតមៀនម្កាក់	មាក់ក្លឿផ្លែជ្រែក	មៃសាក់បាក់មេឃ
	ម្រេចម្រះបះទង ។
យ មានយីហ៊ុប	អប់ក្លិនថ្ងៃយប់	ឈ្ងុយឈ្ងប់កន្លង
ជាទីប្រាថ្នា	មិនថាប្អូនបង	យិតថោផូរផង់
	យុថ្កាបន្លា ។
រ មានរំដួល	រំចេករំជួល	រំចងទងផ្កា
រយាងរំយោល	រលួសរកា	រយោងរាជា
	រាំងទឹករាំងភ្នំ ។
ល មានលាំងសាត	ល្ងៀងទឹកល្ងៀងស្បាត	ល្វាស្រុកល្វាធំ
ល្ពៅល្មុតសែដា	លួតតូចលួតភ្នំ	ល្វៀងល្វេល្ហុងទុំ
	លាំងជៃដំរី ។
វ មានវល្លិ៍ចារ	វល្លិ៍ជណ្ណើរស្វា	វល្លិ៍ផ្កាធ្មេញត្រី
វល្លិ៍បណ្តូលពេជ្រ	វល្លិ៍បាស់ស្លឹកខ្ចី	វល្លិ៍ជុយចងដៃ
	ពេលបាក់គ្រេចថ្លោះ ។
ស មានសង្កែ	សង្ឃ័រស្មាច់ស្មែ	សូក្រំកកោះ
ស្រគំស្រងាំ	ស្រឡៅស្ងាវខ្ពស់	ស្វាយស្ទាវស្តៅស្តោះ
	ស្រល់ស្បែងស្លែងស្លាក់ ។
ហ មានហៃសាន	ស័ក្តិសមចំណាន	បានស្លឹកត្រជាក់
លាបភ្លឺហើរបាត់	ហង់ទឹកជ្រៅរាក់	ហង់ហើមហូរធ្លាក់
	ដូចបាក់ទំនប់ ។
ឡ មានឡេវអាវ	ខ្លះចូលចិត្តហៅ	ទៅថាជាងប់
និងវល្លិ៍ឡែឡ	ក្រងព្រួលទ្រូលប	ឡតស្លឹកទុកទប់
	ចុកឆ្នុកក្រឡាន ។
អ មានអម្ពិល	អង្គាបុស្សសិល	អង្កាញ់កំញ៉ាន
អង្កោលអំពៅ	អង្គញ់ថ្កូវថ្ងាន់	អំបែងបែកចាន
	អែមអង្គាដី ។
រៀបរាប់ព្រឹក្សា	រាយតាមអក្ខរា	ចារជូនខ្លីៗ
បើមានខុសឆ្គង	សូមទានប្រណី	សូមចប់សេចក្តី
	ប៉ុណ្ណេះឯងហោង ៕