គុណតួព្យញ្ជនៈ

ទស្សនាថ្ងៃនេះ: 5

បទពាក្យប្រាំពីរ

គុណតួព្យញ្ជនៈជាក់អស្ចារ្យ	គុណនោះថ្លៃថ្លាហួសគណនា
ផ្តល់គុណប្រយោជន៍កេរទ្រព្យា	ផ្តល់គោត្តនាមាកេរ្តិ៍កិត្តិយស ។
ផ្តល់ផលសព្វគ្រប់ទាំងយប់ថ្ងៃ	ផ្តល់ន័យសេចក្តីថ្លៃខ្ពង់ខ្ពស់
ផ្តល់ស័ព្ទសញ្ញាឃ្លាពិរោះ	ផ្តល់នោះឈ្មោះថាអស្ចារ្យក្រៃ ។
ក-ផ្តល់កំណើតកើតជាមនុស្ស	ក-ការពារគ្រោះទាំងយប់ថ្ងៃ
ក-ផ្តល់កំណប់គាប់ថ្លាថ្លៃ	ក-ជួយកែច្នៃកើតកិច្ចការ ។
ខ-ផ្តល់ខោអាវស្លៀកដណ្តប់	ខ-ខិតខំគ្របថែរក្សា
ខ-ផ្តល់ខមាអត់ទោសា	ខ-ខំរក្សាដោយខន្តី ។
គ-ផ្តល់គំនិតគិតវែងឆ្ងាយ	គ– គន់គូរស្រាយឱ្យសិរី
គ-ផ្តល់គន្លងដងវិថី	គ-ផ្តល់គប្បីន័យស្រស់ស្រាយ ។
ឃ-ផ្តល់គំហើញឃើញខុសត្រូវ	ឃ-ឃាត់ឃាំងផ្លូវទៅអបាយ
ឃ-ផ្តល់ឃ្លៀងឃ្លាតភ័យអន្តរាយ	ឃ-ផ្តល់ឃ្លាតឆ្ងាយអកុសល ។
ង– ផ្តល់ការងារមមិនឱ្យងាប់	ង-ផ្តល់ងារជាប់មិនឱ្យខ្វល់
ង-ផ្តល់ងាយស្រួលផុតកង្វល់	ង-ផ្តល់ងើបងើយលែងងងឹត ។
ច-ផ្តល់ចំណេះចេះចរចា	ច-ផ្តល់ចំណារជាគំនិត
ច-ផ្តល់ចំណោទចោទចូរគិត	ច-ផ្តល់ចេះពិតចូរចងចាំ ។
ឆ– ផ្តល់ឆន្ទៈពាក់បំណង	ឆ-ផ្តល់ឆ្លើយឆ្លងឆ្លាតចំណាំ
ឆ-ផ្តល់ឆទានមានរាល់ឆ្នាំ	ឆ-ផ្តល់ឆៃយ៉ាំថ្នាំអផ្សុក ។
ជ– ផ្តល់ជំនួយជួយដល់ជាតិ	ជ-ផ្តល់ជូនញាតិឱ្យឃ្លាតទុក្ខ
ជ– ផ្តល់ជោគជ័យសិរីសុខ	ជ-ផ្តល់ជម្រកជ្រកសុខសាន្ត ។
ឈ– ផ្តល់ឈាមជ័រឈររស់រៀន	ឈ-ផ្តល់ជំហានឈានដល់ដាន
ឈ-ផ្តល់ជំហុបឈប់សាមាន្យ	ឈ-ឈប់ឈ្លានពានឈ្លោះទាស់គ្នា
ញ-ផ្តល់ញញឹមស្រស់ប្រិមប្រិយ	ញ-ផ្តល់ញាណីថ្លៃសោភា
ញ-ផ្តល់បញ្ញត្តិញេយ្យធម្មា	ញ-ញាក់ញច់គ្នាឈប់ញុះញង់ ។
ដ-ផ្តល់ដំបូន្មានល្អៗ	ដ-ផ្តល់ដំណតពូជពង្ស
ដ-ផ្តល់ដំណឹងដឹងលែងល្ងង់	ដើរដេកលែងលង់វង្វេងដាន ។
ឋ-ផ្តល់ទីឋានបានស្នាក់នៅ	ឋ-ផ្តល់ឋានត្រូវនៅសុខសាន្ត
ឋ-ផ្តល់ឋានៈថ្នាក់ថ្កើងថ្កាន	ឋ-បានឋិតថេរជាស្ថាពរ ។
ឌ-ផ្តល់ ភណ្ឌៈជាដើមទុន	ឌ-ឌុនសេចក្តីន័យបវរ
ឌ– ឌិនមាសប្រាក់ប៉ាក់លំអ	ឌ-ឌឺមិនល្អឈប់ឌឺដងគ្នា ។
ឍ– ផ្តល់ឍាមរាដ៏ឆ្អៅឆ្អិន	ឍ-ផ្តល់ឍាលិនប៉ិនការពា
ឍ-ផ្តល់ឍាលាខែលឈ្នះមារ	ឍ-ធន់ធានាបច្ចាមិត្រ ។
ណ– ផ្តល់ដំណឹងឱ្យដឹងការណ៍	ណ-ផ្តល់ចំណារឱ្យពិនិត្យ
ណ-ផ្តល់ណែនាំឱ្យខំគិត	ណ-ផ្តល់គំនិតឱ្យចំណាប់ ។
ត-ផ្តល់តំណែងតែងតាំងងារ	ត-ផ្តល់តម្រាជាក្បួនច្បាប់
ត-ផ្តល់ត្រចៀកសម្រាប់ស្តាប់	ត-ផ្តល់តម្រាប់ឱ្យត្រាប់តាម ។
ថ– ផ្តល់ថែទាំថ្នមរក្សា	ថ-ផ្តល់ថវិកាតែហាមប្រាម
ថ-ថាថង់ធ្លាយងាយរហាម	ថ-ថាកុំញ៉ាមតាមគេឱ្យ ។
ទ-ផ្តល់ទំនាក់ទាក់ទងគ្នា	ទ-ផ្តល់ទានាជាអំណោយ
ទ-ផ្តល់ទន់ភ្លន់គន់មិនធ្លោយ	ទ-ផ្តល់ទឹកឱ្យស្ទួយជីវិត ។
ធ-ផ្តល់ធនធានមានធូរធារ	ធ-ផ្តល់ធម្មាដ៏ស័ក្តិសិទ្ធិ៍
ធ-ផ្តល់ធរណីទ្រជីវិត	ធ-ពិតធំធេងជួយធានា ។
ន-ផ្តល់នគរដ៏ថ្កើងថ្កាន	ន-ផ្តល់និព្វានឋានសោភា
ន-ផ្តល់និស្ស័យជួបជុំគ្នា	ន-ផ្តល់នាមាហៅគ្នាបាន ។
ប-ផ្តល់បែបបទឱ្យប្រតិបត្តិ	ប-បានបង្ហាត់និងបង្រៀន
ប-ផ្តល់របៀបរៀបចំប្រាណ	ប-បានប្រទាននូវបញ្ញា ។
ផ-ផ្តល់ភោគផលយ៉ាងផូរផង់	ផ-ផ្តល់ផ្ចិតផ្ចង់ជាផ្លែផ្កា
ផ-ផ្តល់ផាសុកចិត្តកាយា	ផ-ផ្តល់ផែនការផលិតផល ។
ព-ផ្តល់ពូជពង្សវង្សត្រកូល	ព-ផ្តល់ពំនោលពោលសម្គាល់
ព-ផ្តល់ពាក្យពិតផុតកង្វល់	ព-ផ្តល់ពេជ្រមាសពាសពេញដី។
ភ-ផ្តល់ភូមិភាគភពផែនដី	ភ-ផ្តល់ភក្តីស្រស់ប្រិមប្រិយ
ភ-ផ្តល់ភាសិតពិតថ្លាថ្លៃ	ភ-ផ្តល់អភ័យអត់ទោសា ។
ម-ផ្តល់មាគ៌ាដ៏មង្គល	ម-ផ្តល់មគ្គផលតាមកម្មា
ម-ផ្តល់មតិឱ្យភ្លឺថ្លា	ម-ផ្តល់មាតាបិតាផង ។
យ-ផ្តល់យុត្តិធម៌ដ៏ត្រឹមត្រូវ	យ-យោនយកផ្លូវទៅមិនឆ្គង
យ-ផ្តល់យោគយល់ញាតិប្អូនបង	យ-យកគន្លងធម៌ជាធំ ។
រ-ផ្តល់រតនៈត្រ័យថ្លៃថ្លា	រ-ផ្តល់រក្សាសរណគម
រ-ផ្តល់រាក់ទាក់យ៉ាងមនោរម្យ	រ-រស់ថ្កើងថ្កុំផ្តុំរមនា ។
ល-ផ្តល់លាភយសលូតលាស់ល្អ	ល-លះបាបធម៌ដ៏ពាលា
ល-ផ្តល់លក្ខណាសមសោភា	ល-ផ្តល់វេលាឥតលក្ខខណ្ឌ ។
វ-ផ្តល់រង្វាន់ឱ្យវិវឌ្ឍន៍	វ-ផ្តល់វត្តបទធម៌សំខាន់
វ-ផ្តល់វាយោប្តូរឧស្ម័ន	វ-ផ្តល់វិមានឋានវិសេស ។
ស-ផ្តល់សង្គហៈជួយសង្រ្គោះ	ស-ផ្តល់ស្ម័គ្រស្មោះមិនគេចវេស
ស-ផ្តល់សង្ខារសព៌ាង្គនេះ	ស-ស៊ូចំណេះនឹងសិក្សា ។
ហ-ផ្តល់ហត្ថាចារសរសេរ	ហ-ផ្តល់ហត្ថលេខ៍ឱ្យសញ្ញា
ហ-ផ្តល់ក្លាហានហ៊ានចាត់ការ	ហ-ហាហាមប្រាមកុំហួសហេតុ ។
ឡ-ផ្តល់ឡើងថ្នាក់ឬស័ក្តិយស	ឡ-ឡើងកេរ្តិ៍ឈ្មោះខ្ពស់ត្រដែត
ឡ-កុំឡិមឡុមយកតែឆ្អែត	ឡូឡាអត់ហេតុដូចអ្នកឡប់ ។
អ-ផ្តល់អំណោយឱ្យឱនអង្គ	អ-ឱ្យផូរផង់ស្ទើរគ្រប់សព្វ
អ-ផ្តល់អំណាចអាចស្កល់ស្កប់	អ-អប់កិត្តិយសខ្ពស់ដោយអត្ថ។
នេះហើយគុណតួនៃព្យញ្ជនៈ	បញ្ជាក់លោកអ្នកដោយកាត់ៗ
សូមស្លេះបញ្ចប់ដោយប្រតិបត្តិ	កណ្តាលយប់ស្ងាត់ប៉ុណ្ណេះហោង៕