ព្យញ្ជនៈខ្ជាក់មច្ឆា

ទស្សនាថ្ងៃនេះ: 12

បទកាកគតិ

សម្បតិ្តធម្មជាតិ	សម្បូរព្រោងព្រាត	ជាតិជាមច្ឆា
ខ្លះតូចខ្លះធំ	ជុំក្នុងជលសា	សាបប្រៃសីមា
	បឹងបួរសមុទ្រ ។
ខ្លះមានស្រកា	ខ្លះទៀតសោតណា	មានតែស្បែកសុទ្ធ
ខ្លះខ្មៅខ្លះស	ខ្លះល្អបំផុត	ខ្លះចេះប្រយុទ្ធ
	តតាំងច្បាំងគ្នា ។
ខ្ញុំសូមរៀបរាប់	រើសយកមកភ្ជាប់	ជាប់តួអក្ខរា
ចារឆ្លាក់ខ្ជាក់ឈ្មោះ	អស់សព្វមច្ឆា	រស់ក្នុងជលសា
	សាបក្តីប្រៃក្តី ។
ក មានក្រោសក្រាយ	កន្តាំងក្លាំងហាយ	ក្រម៉យក្របី
ក្រាញ់ក្រឹមកន្ត្រប	ក្បកកន្ធក្អី	កែសស្លឹកឫស្សី
	ក្អែកក្អោរកាហែ ។
ខ មានខ្ចាខ្ជឹង	ខ្សាច់ខ្សាខ្លាខ្លឹង	ខ្យងបឹងខ្យងស្រែ
ខ្មាន់ខ្សានខ្យងដូង	ខ្យងហោងហូរហែ	ខ្យងត្នោតផងដែរ
	ខ្យងខ្ចៅហោកហ៊ាន ។
គ មានគល់រាំង	គល់ព្រេចកាឡាំង	គីគូនគ្រុមគ្រាន
គុជជៀគញ្ជាំ	គ្រុមប៉ោកក៏មាន	គ្រែងឈាមឆាចៀន
	គ្រុមចំពុះទា ។
ឃ ឃើញតែឃ្លុំ	ធំធាត់ជាងឃ្មុំ	ពុំមែនមច្ឆា
តែសូមលើកយក	មកពិពណ៌នា	បំពេញឃ្លោងឃ្លា
	តាមការតាក់តែង ។
ង មានតែងាវ	តាមការស្រាវជ្រាវ	សព្វគ្រប់កន្លែង
ហាក់ដូចងាប់អស់	គួរឱ្យចំបែង	ងាវនៅម្នាក់ឯង
	អត់ញាតិសាច់សា ។
ច មានចង្កែង	ចង្វាខ្លីវែង	មូលឆ្នូតក្រឡា
ស្រកាពង្រូល	លិញក្អែកត្រោសផ្កា	កំភ្លងកំភ្លា
	ចាបចេកទុំពណ៌ ។
ឆ មានឆ្លូញស្លាត	ឆ្លាមឆ្លាំងពុកមាត់	ឆ្កោកឆ្ពិនព្រុយស
ឆ្ពិនមូលឆ្ពិនប្រាក់	ឆ្មាឆ្មាំងខ្មៅស	ឆ្លូញក្រហមពណ៌
	ឆ្តោឆ្លុកឆ្លូញឆ្លាត ។
ជ ជញ្ជក់ដៃ	ជញ្ជូនបាយប្តី	ជន្លូញជន្លាត
ជន្ទាសភ្លុកតូច	ជន្លូញមាន់ស្អាត	ជន្លូនច្រើនទៀត
	ជ្រូកជ្រក់ស្ងោរចៀន ។
ឈ មានឈ្វាតហ្វូង	ឈ្វាតសឈ្វាតដូង	ឈ្វាតពណ៌ក៏មាន
ក្រហមប្រផេះ	ទឹកមាសប្រាក់លាន	កន្ទុយមិនខ្វៀន
	ឈ្វាតស្មើកន្ទុយ ។
ញ មិនឃើញសោះ	ឬមិនទាន់ញាស់	ព្រោះគ្មានតំរុយ
ប្រឹងប្រែងរកដែរ	តែដូចជាខុយ	រកមួយធ្វើនុយ
	តពូជមិនបាន ។
ដ មានដងដាវ	ដងខ្លួនស្រួចស្រាវ	ដូចដាវចំណាន
ដំរីដងខ្ទែង	ខ្លួនវែងហំហាន	ដៀបដាវដួលចាន
	ដំឡូងដូងត្រាវ ។
ឋ ឋិតឋានឆ្ងាយ	ហួសហានិយាយ	ស្តីថាមិនត្រូវ
ទុកដូចស្មើអត់	ទុកដូចស្មើអត់	ថ្ងៃក្រោយមានផ្លូវ
	ប៉ះប៉ូវបន្ត ។
ឌ ក៏ដូចគ្នា	សួរសព្វមីងមា	ដូនតាថាក្រ
មិនធ្លាប់មានទេ	រាប់រយតំណ	ចង់ អាំង ខ ស្ល
	ក៏រកមិនបាន ។
ឍ ធំតែឈ្មោះ	មិនមាននៅរស់	សាបព្រោះសន្តាន
សូន្យឈឹងទាំងអស់	សព្វជ្រោះជលឋាន	រកមួយមិនបាន
	តពូជពង្សឡើយ ។
ណ ក្រក្រីណាស់	មិនដែលប្រទះ	ជួបជួនមួយឡើយ
ប្រហែលជាស្លាប់	ឬស្លអស់ហើយ	មិនដែលឮឡើយ
	ថាមានឈ្មោះអ្វី ។
ត មានតាអោន	តាពកតាប្រោន	តានេលទ្រេលដី
ត្រសក់ត្រសេក	ត្រចៀកដំរី	ត្រសេះខ្លួនខ្លី
	ត្រសងឆ្លេឆ្លា ។
ថ ថាមិនត្រូវ	សួរសព្វម៉ែឪ	មីងមាយាយតា
មានតែថ្លាន់ថ្លែន	លោកថ្លែងដោះសារ	មិនមែនមច្ឆា
	ថាសោះតែខាន ។
ទ មានទក់រ៉ស់	ទន់ជ័យល្អស្រស់	ទ្រនេសប្រេះចាន
ទ្រនេលទាស់ភ្លុក	ងៀតទុកយូរបាន	ស្រេចញាតិសន្តាន
	លៃលកកែច្នៃ ។
ធ ធ្លាប់ធូរធារ	ធនធានហូរហៀរ	ធំធាត់ពេកក្រៃ
ឥឡូវក្រីក្រ	ផុតពូជក្សិណក្ស័យ	វិនាសខ្ចាត់ខ្ចាយ
	គ្មានសល់មួយសោះ ។
ន ក៏ដូចគ្នា	មិនមានពូជធារ	សេសសល់ចន្លោះ
នឹកគួរអាណិត	គិតគួរស្រណោះ	វិនាសសូន្យអស់
	ស្រណោះកន្លង ។
ប មានបបែល	បាឡែនក្រាស់ក្រែល	បង្គាបង្កង
ប្រាប៉ាសេអ៊ី	ប្រម៉ាប្រម៉ង	បន្ទាសភ្លុកផង
	ប៉េកាក្របី ។
ផ មានផ្ទក់រ៉ស់	ផ្ទោងផ្ទាត់ផសៗ	ព្រោះខ្លួនមិនខ្លី
ផ្សោតសាបសមុទ្រ	ពូជពិតក្រក្រី	ផ្កាចាត្រាបី
	ផ្កាគស្ងោរឆា ។
ព មានព្រលូង	ព្រួលព្រូសដំឡូង	ពោព្រុយសង្ហា
ពុកមាត់ក្របី	ពោពុកមាត់ឆ្មា	ពោព្រាចក្រឡា
	ពោពងពេញពោះ ។
ភ មានតែភេ	មិនចំតួទេ	រាប់យកតែឈ្មោះ
មានត្រីកំភ្លាញ	កំភ្លងរូបស្រស់	ស្រង់យកចោះៗ
	បំពេញឃ្លោងឃ្លា ។
ម មានមឹកមាស	មឹកស្នូកសន្ទះ	មឹកបំពង់សា
មឹកដៃពីងពាង	មឹកបារីឆ្មា	ក្រម៉យក្រម៉ា
	ម្រេចប្រៃមករ ។
យ មានតែយក្ស	យកមកបញ្ជាក់	លោកអ្នកយ៉ៗ
សូមជួយយឹតយោង	ប្រឹងរកបន្ត	យ យ៉ាប់ក្រីក្រ
	យូរយារពេកណាស់ ។
រ មានរាំងរាជ	រ៉ស់រនូតស្នាច	រាហ៊ូរមាស
រៀលតុបអង្កាម	រត់តាមរមាស	រាហ៊ូសម្ភាសន៍
	សួរនាំរឿងរ៉ាវ ។
ល មានលាសលេញ	ល្អោនរត់ប្រដេញ	លលកសស្ងាវ
លាសលាក់ដុំសាច់	ខ្លាចល្អោនឆាឆៅ	លេញខំអំពាវ
	លលកបោកខ្ទាត់ ។
វ វិនាសអស់	មិនមានសល់សោះ	ព្រោះតែវិវាទ
វង្វេងនឹងឈ្លោះ	ទាស់ទែងសាច់ញាតិ	វឹកវរវ័ណ្ឌស្នៀត
	ខ្ទាត់ពូជខ្ចាត់ខ្ចាយ ។
ស មានស្ទក់ស	សេះសមុទ្រល្អ	ស្មុកសេះសណ្តាយ
ស្រកាក្តាមស	សង្កត់ប្រាក់រាយ	សេកស្លឹកកាឆាយ
	ឫស្សីស្លឹកស្លា ។
ហ មានហ្វីឡាប់	រាប់ឱ្យពេញស័ព្ទ	គឺហ្វីឡាប់យ៉ា
ខ្លាំងហាយកាហែ	កែច្នៃស្ងោរឆា	អាងចៀនក្តីណា
	តាមការបេតី ។
ឡ មានឡហាន	សួរសព្វសន្តាន	ក្មេងចាស់ប្រុសស្រី
មិនមានចម្លើយ	ឆ្លើយរាយសេចក្តី	រៀបរាប់ឈ្មោះត្រី
	ណាមួយឱ្យចំ ។
អ មានអណ្តែង	អន្ទង់ខ្លីវែង	ខ្មៅសក្រហម
អណ្តាតនាគ-ឆ្កែ	អោបទូកទុំក្អម	អាចម៍កុកអន្ទាំ
	អង្រែវែងខ្លី ។
រៀបរាប់មច្ឆា	រាយតាមអក្ខរា	ចារជូនខ្លីៗ
បើមានខុសឆ្គង	សូមទានប្រណី	សូមចប់សេចក្តី
	ប៉ុណ្ណេះឯងហោង ៕