ពាក្យម្តាយធ្លាយតាមព្យញ្ជនៈ

ចំនួនទស្សនា: 36

បង្ហោះដោយ:

Johnny ចន្នី

នត្ថិ សន្តិ បរំ សុខំ
សុខដទៃក្រៅពីសេចក្តីស្ងប់ពុំមានឡើយ។

🔸រនាបបាក់យករនាបជួស សំដីជ្រុលជ្រួសជួសមិនបានឡើយ។

បទពាក្យប្រាំពីរ

ពាក្យម្តាយធ្លាយតាមព្យញ្ជនៈ ក	ព្រួយខ្លាចកូនល្អ កែកកិច្ចការ
កែកគោត្តត្រកូលកែកមេបា	កែកកោងឫស្យាកែកក្រឹត្យក្រម ។
ពាក្យម្តាយធ្លាយតាមព្យញ្ជនៈ ខ	ព្រួយខ្លាចកូនល្អ ខ្វះខិតខំ
ខ្វះខាតខ្វាយខ្វល់ផលមិនសម	ខ្វះខ្វែងស្តុកស្តម្ភនាំទុក្ខា ។
ពាក្យម្តាយធ្លាយតាមព្យញ្ជនៈ គ	ព្រួយខ្លាចកូនល្អ គេចគិតការ
គេចគុណគួរគាប់គុណមេបា	គេចគុណអាចារ្យគុណរៀមច្បង ។
ពាក្យម្តាយធ្លាយតាមព្យញ្ជនៈ ឃ	ព្រួយខ្លាចកូនល្អ ឃ្លាតគន្លង
ឃ្លាតឃ្លៀងឃ្លោងឃ្លាឃ្លាតប្អូនបង	ឃ្លាតឃ្លាញាតិផងឃ្លោងឃ្លាតផ្លូវ ។
ពាក្យម្តាយធ្លាយតាមព្យញ្ជនៈ ង	ព្រួយខ្លាចកូនល្អ ងរង៉ូវ
ងងើយងើបងើមិនមើល៍ឳ	ងងាកខុសផ្លូវទៅងាប់ងាយ ។
ពាក្យម្តាយធ្លាយតាមព្យញ្ជនៈ ច	ព្រួយខ្លាចកូនល្អ ចាយខ្ជះខ្ជាយ
ចាយវាយតាមចិត្តមិនគិតឆ្ងាយ	ចាយចូលអន្តរាយចាយចែវខ្ទង់
ពាក្យម្តាយធ្លាយតាមព្យញ្ជនៈ ឆ	ព្រួយខ្លាចកូនល្អ ឆោតឆៅល្ងង់
ឆោតឆៅល្ងីល្ងើភ្លីភ្លើផង	ឆោតឆៅសៅហ្មងឆ្គងឆ្គាំទៀត ។
ពាក្យម្តាយធ្លាយតាមព្យញ្ជនៈ ជ	ព្រួយខ្លាចកូនល្អ ជិះជាន់ជាតិ
ជិះជាន់សាសនាជិះជាន់ញាតិ	ជិះជាន់ប្លន់ជាតិកំណើតខ្លួន ។
ពាក្យម្តាយធ្លាយតាមព្យញ្ជនៈ ឈ	ព្រួយខ្លាចកូនល្អ ឈ្លើយឈ្លោះក្បួន
ឈ្លើយឈ្លោះឈ្លានពានហ៊ានគុំគួន	ឈ្លើយឈ្លោះឈ្លក់ខ្លួនឈ្លេមឥតន័យ ។
ពាក្យម្តាយធ្លាយតាមព្យញ្ជនៈ ញ	ព្រួយខ្លាចកូនល្អ ញៀនស្រាស្រី
ញៀនល្បែងពាលាមិនគប្បី	ញៀនល្បែងស្រាស្រីក្តីវិនាស ។
ពាក្យម្តាយធ្លាយតាមព្យញ្ជនៈ ដ	ព្រួយខ្លាចកូនល្អ ដើរផ្តេសផ្តាស
ដើរដេកផឹកស៊ីដួលចោលផ្ទះ	ដើរដាច់កេរ្តិ៍ខ្មាសប៉ះដើមដាន ។
ពាក្យម្តាយធ្លាយតាមព្យញ្ជនៈ ឋ	ព្រួយខ្លាចកូនល្អ ឋិតឆ្ងាយឋាន
ឋិតឆ្ងាយទានសីលឆ្ងាយនិព្វាន	ឋិតឆ្ងាយកល្យាណឆ្ងាយសួគ៌ា ។
ពាក្យម្តាយធ្លាយតាមព្យញ្ជនៈ ឌ	ព្រួយខ្លាចកូនល្អ ឌឺដងគ្នា
ឌឺដងឌុកដាន់ជាន់ដានមារ	ឌឺដងដុះពៀរពេញចង្រៃ ។
ពាក្យម្តាយធ្លាយតាមព្យញ្ជនៈ ឍ	ព្រួយខ្លាចកូនល្អ ធូរធារដៃ
ធូរធារថែមថយធនធានក្ស័យ	ធូរធារអត់ន័យក្លាយធូរថោក ។
ពាក្យម្តាយធ្លាយតាមព្យញ្ជនៈ ណ	ព្រួយខ្លាច កូនល្អ ណាយនឹងស្លោក
ណាយនឹងណែនាំពាក្យពេចន៍លោក	ណាយហ្នឹងនាំថោកទាបអាត្មា ។
ពាក្យម្តាយធ្លាយតាមព្យញ្ជនៈ ត	ព្រួយខ្លាចកូនល្អ តុះតុញសារ
តុះតុញគំនិតគិតកិច្ចការ	តុះតុញប្រាជ្ញាការរាក់ជ្រៅ ។
ពាក្យម្តាយធ្លាយតាមព្យញ្ជនៈ ថ	ព្រួយខ្លាច កូនល្អ ថ្លាថ្លែងទៅ
ថ្លាថ្លែងថ្លោះធ្លោយថ្លឹងមិនត្រូវ	ថ្លាថ្លែងធ្លាក់ផ្លូវទៅលែងថ្លា ។
ពាក្យម្តាយធ្លាយតាមព្យញ្ជនៈ ទ	ព្រួយខ្លាច កូនល្អ ទាស់ទែងគ្នា
ទាស់ទែងទាក់ទងពង្សញាតិសា	ទាស់គ្នាជាទោសទៅអបាយ ។
ពាក្យម្តាយធ្លាយតាមព្យញ្ជនៈ ធ	ព្រួយខ្លាច កូនល្អ ធ្លោយធ្លាក់កាយ
ធ្លោយធ្លាក់គំនិតគិតមិនឆ្ងាយ	ធ្លោយធ្លាក់អន្តរាយធ្លាយធូរធារ ។
ពាក្យម្តាយធ្លាយតាមព្យញ្ជនៈ ន	ព្រួយខ្លាច កូនល្អ និន្ទាគ្នា
និន្ទាឈ្នានីសនាំមានពៀរ	និន្ទាជាទោសបន្សាបគុណ ។
ពាក្យម្តាយធ្លាយតាមព្យញ្ជនៈ ប	ព្រួយខ្លាច កូនល្អ បោះបង់បុណ្យ
បោះបង់បណ្តាំបំពានគុណ	បោះបង់នេះធ្ងន់ពន់ពេកណាស់ ។
ពាក្យម្តាយធ្លាយតាមព្យញ្ជនៈ ផ	ព្រួយខ្លាច កូនល្អ ផឹកផិតផ្ទះ
ផឹកផិតភូតភរអាក្រក់ណាស់	ផឹកផិតផ្តេសផ្តាស់ប៉ះផ្តឹងផ្តល់ ។
ពាក្យម្តាយធ្លាយតាមព្យញ្ជនៈ ព	ព្រួយខ្លាចកូនល្អ ពោលប៉ះពាល់
ពោលពាក្យមិនពិតពាំអំពល់	ពោលពាក្យពិសពុលពារពូជពង្ស ។
ពាក្យម្តាយធ្លាយតាមព្យញ្ជនៈ ភ	ព្រួយខ្លាច កូនល្អ ភរប្អូនបង
ភរភូតមិនពិតផុតផូរផង់	ភរភូតច្រើនលង់ផុងអាត្មា ។
ពាក្យម្តាយធ្លាយតាមព្យញ្ជនៈ ម	ព្រួយខ្លាច កូនល្អ មិនមេត្តា
មិនមានមិត្តភ័ក្តិស្ម័គ្ររក្សា	មិនមានមីងមាណារាប់រក ។
ពាក្យម្តាយធ្លាយតាមព្យញ្ជនៈ យ	ព្រួយខ្លាច កូនល្អ យាយីលោក
យាយីយុកយាក់ធ្លាក់ធ្លុងថោក	យាយីយឺតយោកលោកហៅយ៉ាប់ ។
ពាក្យម្តាយធ្លាយតាមព្យញ្ជនៈ រ	ព្រួយខ្លាច កូនល្អ រស់រុលច្បាប់
រស់រុំរឿងរ៉ាវហួសរ៉ាយរ៉ាប់	រស់រៀនគ្មានច្បាប់ជាប់ទារុណ្ឌ ។
ពាក្យម្តាយធ្លាយតាមព្យញ្ជនៈ ល	ព្រួយខ្លាច កូនល្អ លង់លោភលន់
លង់លក់លួចលាក់រលាកគុណ	លង់លក់លូកលាន់ជួនលិចលង់ ។
ពាក្យម្តាយធ្លាយតាមព្យញ្ជនៈ វ	ព្រួយខ្លាចកូនល្អ វង្វេងវង្ស
វង្វេងវត្តវ៉ាធម៌អារ្យផង	វង្វេងគន្លងប្លង់វឌ្ឍនា ។
ពាក្យម្តាយធ្លាយតាមព្យញ្ជនៈ ស	ព្រួយខ្លាច កូនល្អ សូន្យឧស្សាហ៍
សូន្យសោះរៀនសូត្រស្រូតសិក្សា	សូន្យសព្វសញ្ញាសូន្យសុខសាន្ត ។
ពាក្យម្តាយធ្លាយតាមព្យញ្ជនៈ ហ	ព្រួយខ្លាច កូនល្អ ហៀរហួសប្រាណ
ហៀរហូរហឺហាហាច់ហំហាន	ហៀរហួសប្រមាណហូរហួតអស់ ។
ពាក្យម្តាយធ្លាយតាមព្យញ្ជនៈ ឡ	ព្រួយខ្លាច កូនល្អ ឡូយឡេះឡោះ
ឡូយឆាយឡេមឡឺមមិនសមសោះ	ឡូយថូយឡេះឡោះមិនល្អឡើយ ។
ពាក្យម្តាយធ្លាយតាមព្យញ្ជនៈ អ	ព្រួយខ្លាច កូនល្អ អួតអត់ត្រើយ
អួតអាងអេចអូចមិនល្អឡើយ	អួតអាងនោះហើយនាំអំពល ។
ពាក្យម្តាយរាយតាមតួអក្ខរា	បញ្ជាក់ប្រាប់ថាលោកខ្វាយខ្វល់
គិតគូរកូនចៅមិនមានសល់	លោកសែនអំពល់គ្រប់វេលា ។
ច្នេះហើយសូមអស់កូនប្រុសស្រី	គប្បីគិតគូរគុណគាប់ជា
គឺគុណព្រះព្រហ្មជុំគេហា	នឹងបានសុខាប្រាកដហោង ៕