តម្លៃព្យញ្ជនៈ

ទស្សនាថ្ងៃនេះ: 11

បទកាកគតិ

តម្លៃព្យញ្ជនៈ	ថ្លៃថ្លាអនគ្ឃ	លាក់ន័យខ្លឹមសារ
ត្រាត្រាំទំនុក	ផ្ទុកតាមវោហារ	ជ្រៅតាមបញ្ញា
	ថ្លាថ្លែងតែងបាន ។
វប្បធម៌ភាសា	សិល្បៈសាសនា	ថ្លៃថ្លាថ្កើងថ្កាន
បានពីអក្ខរា	ចារឆ្លាក់ប៉ាក់ដាន	ផ្សែផ្សំចំណាន
	ផ្គុំបានខ្លឹមសារ ។
សូមជូនឧបមេយ្យ	លៃពីតម្លៃ	នៃតួអក្ខរា
ទាំងសាមសិបបី	មកច្នៃរចនា	ជាន័យខ្លឹមសារ
	ថ្លៃថ្លាហួសថ្លែង ។
ក កើតកិច្ចការ	កេរកាលផ្តាំថា	កើតពីប្រឹងប្រែង
កាប់គាស់កកាយ	កែកុនលីសែង	ប្រាកដជាក់ស្តែង
	កើតកេរទ្រព្យា ។
ខ ខំខ្វាយខ្វល់	ខ្លបខ្លាចអំពល់	ផលពិតសុខា
ខាត់ខុសខូចខិល	ខឹងខ្ជឹលខ្ជីខ្ជា	ខាតខើចវេរា
	ខាប់ខាងខន្តី ។
គ គេងគិតគូរ	គយគន់គុណគ្រូ	គង់ជួបគប្បី
គំនុំគុំគួន	គួរកុំគិតអី	គុណគាប់ប្រពៃ
	គួរគប់បណ្ឌិត ។
ឃ ឃើញខុសត្រូវ	ឃើញឃាតឃោរឃៅ	ត្រូវកុំឃុបឃិត
ឃាត់ឃាំងបាំងបាប	ឆាប់បាត់បាបមិត្ត	ឃ្លាតឃ្លាទុច្ចរិត
	ពិតលែងថោកទាប ។
ង ងាករកងារ	ងើបងើយជានា	ឫក្សពាររាបទាប
មិនងោកងីងើ	ភ្លើខុសរបៀប	បាត់បង់សុភាព
	ងាប់ងាយជាងងៀត ។
ច ចារចាត់ចែង	ចេះចោទកោតក្រែង	ចូលចិត្តជួយជាតិ
ចែកចាយជំនួយ	ចូរជួយកុំឃ្លាត	ជួយហើយជួយទៀត
	ចាស់ៗចូលចិត្ត ។
ឆ ឆាប់ឈូសឆាយ	ឆោតឆៅទៅឆ្ងាយ	ខ្លាចឆាបឆេះមិត្ត
ឆេវឆាវឆុងឆាំង	ឆឆកបញ្ឆិត	ឆើតឆាយឆ្ងាយគិត
	សូមឆាប់ឈប់ទៅ ។
ជ ជួបជុំគ្នា	ជជែកកិច្ចការ	ជញ្ជឹងខុសត្រូវ
ជិះជាន់ជាតិឯង	កុំជ្រែងជីកជ្រៅ	ជួយជាតិត្រឹមត្រូវ
	ជាតិជាក់ជោគជ័យ ។
ឈ ឈានទៅមុខ	ឈានឈោងតោងសុខ	ឈានមុខលកលៃ
ឈានឈប់ឈូឆរ	ឈប់ឈរឆ្មើងឆ្មៃ	ឈូសឆាយចង្រៃ
	ឈានឈរឈប់ឈ្លោះ ។
ញ ញឹមញញែម	ញ៉េះញ៉ោះផ្អែមល្ហែម	ញ៉ាំងញាតិស្រណោះ
នឹកនាញឹកញាប់	រាប់រកស្ម័គ្រស្មោះ	ញញឹមស្រស់បស់
	ញាតិញោមរោមរាប់ ។
ដ ដើរដេកដឹង	ដើមដានស្នានស្នឹង	ដូចដឹងដល់ដប់
ដាំដុះដោះដូរ	ដាក់ដោយប្រសប់	ដុសខាត់ទម្លាប់
	ឱ្យជាប់ឧត្តម ។
ឋ ឋិតថែថួន	ថែទាំគុណធ្ងន់	កុំថយបន្លំ
ថែហើយថែទៀត	ថែថែមឱ្យសម	គុណគាប់ស្តុកស្តម្ភ
	មាតាបិតា ។
ឌ ឌុនឌឺដង	ដៀមដាមចងក្រង	ឌុកដាន់ចណ្ឌា
ប្រឌិតដើមដាន	ដុតដាលដូនតា	ដាសតឿនលឿនជា
	គួរតែដោះដូរ ។
ឍ ធនធូរធារ	ធំធាត់វឌ្ឍនា	ទ្រព្យាហៀរហូរ
ធុនតូចធុនធំ	ផ្សំផ្គុំសម្បូរ	សម្បត្តិជន់ជោរ
	ធូរធារឥតខ្វះ ។
ណ ណាត់ណែនាំ	អំណត់អត់ទ្រាំ	នាំអ្នកណាណាស់
ន័យនេះនឹមនួន	នឹងបានយល់ច្បាស់	ល្អិតល្អន់ល្អល្អះ
	នែបនិត្យនឹងន័យ ។
ត តបស្នងគុណ	តបតគុណមុន	គុណបុព្វការី
តែងតែបានបុណ្យ	តទុនតម្លៃ	តទៅមុខថ្ងៃ
	ថ្លៃថ្លាឧត្តម ។
ថ ថែម៉ែពុក	ថ្នាក់ថ្នមទំនុក	ពុកម៉ែជាព្រហ្ម
តបតាមលំអាន	ឱ្យបានមុតមាំ	គុណលោកស្តុកស្តម្ភ
	ធំធេងពេកក្រៃ ។
ទ ទប់ទស់ទែង	ទាក់ទងគ្នាឯង	កុំទាស់គ្នាអី
ទោរទន់អត់ទោស	ទើបឈ្មោះថ្លាថ្លៃ	ទោះទាស់ម្តេចក្តី
	តបតាមមេត្តា ។
ធ ធន់អំណត់	នឹងធឹងអត់ធ្មត់	ធំធាត់ធម៌អាថ៌
បានជាធនធាន	ធំធេងអស្ចារ្យ	ប្រាជ្ញប្រាយហៅថា
	ទ្រព្យាពិសិដ្ឋ ។
ន នៅនឹងន	ន័យនេះល្អះល្អ	នួននាងពិនិត្យ
កុំនៅទំនេរ	ទទេគំនិត	ចរណៃចូរគិត
	ន័យនេះផងណា ។
ប បោះបង់បាប	បៀតបៀនថោកទាប	បែបបទឫស្យា
បាចបោកបាញ់បោះ	បែកបែរមេបា	បំបាត់បាណា
	បានបុណ្យច្រើនក្រៃ ។
ផ ផាតិភោគផល	ផូរផង់យង់យល់	ផលផុសថ្លាថ្លៃ
ផិតផាយភូតភរ	ផុងផុតភក្តី	ផឹកផុងលង់ថ្ងៃ
	ផលមិនផូរផង់ ។
ព ពោលពាក្យពិត	ពោរពេញសុចរិត	ពាក្យពិតទៀងត្រង់
ពាក្យពេចន៍ពុំពិត	ពុំពោលកន្លង	ពាក់ព័ន្ធសៅហ្មង
	ពាលពុំប្រពៃ ។
ភ ភប់ភោគផល	ផូរផង់មង្គល	ផលផុតភិតភ័យ
ភាវនាចំរើន	កើនភាគផលថ្មី	ភ័ព្វព្រេងនិស្ស័យ
	ថ្លៃថ្លាឥតខ្ចោះ ។
ម មានមេត្តា	មូលមិត្តសាច់សា	ស្នេហាស្ម័គ្រស្មោះ
មូលមករាក់ទាក់	មិនមានទើសទាស់	ម៉ត់ហ្មងកេរ្តិ៍ឈ្មោះ
	រស់មានមុខមាត់ ។
យ យកយោគយល់	យោនយកមគ្គផល	យល់លំអានរ័ត្ន
ជាយានស្ពានផ្លូវ	យោលត្រូវតាមបទ	យសស័ក្តិវិវឌ្ឍន៍
	ប្រាកដយូរយារ ។
រ រស់រៀនសូត្រ	រុងរឿងរហូត	រុះរោយវេរា
រួញរៀវរឿងរ៉ាវ	សល់នៅរម្យនា	រួបរួមរកគ្នា
	រាក់ទាក់រីករាយ ។
ល លះលោភលន់	លបលួចលាក់ជន	លូកលាន់លែបខាយ
លាក់លៀមលលេង	យូរលង់អន្តរាយ	លិចលង់ផុងកាយ
	អន្តរាយកេរ្តិ៍ឈ្មោះ ។
វ វៀរវិវាទ	វឹកវរចោលម្សៀត	វាតចោលឱ្យអស់
កុំវក់វង្វេង	វិលវល់នឹងឈ្លោះ	វៀចវេរមិនស្មោះ
	យសមិនវិវឌ្ឍន៍ ។
ស ស៊ូសិក្សា	ស៊ូសព្វសញ្ញា	សូន្យសោះកំសត់
សន្សំសុខសាន្ត	តាមលំអានរ័ត្ន	សាងសន្សំបទ
	ស្ពានសួគ៌ាឋាន ។
ហ ហាមហ៊ឺហា	ហាច់ហើរលីលា	ហ៊ឹកហ៊ាក់ក្លាហាន
ប្រយ័ត្នហិនហោច	ហួតខ្លោចខ្លួនប្រាណ	ព្រោះខ្លៅសាមាន្យ
	ហ៊ានហួសហ្នឹងហើយ ។
ឡ ឡើងលូតលាស់	កុំឡូយឱ្យសោះ	នោះមិនល្អឡើយ
ឡេមឡឺមឡេះឡោះ	លោកហាមអស់ហើយ	ឡូឡាមិនស្បើយ
	ក៏មិនល្អដែរ ។
អ ឱនអង់អាច	អត់ឱនឱ្យប្រាជ្ញ	អង់អាចពូកែ
តែកុំអួតអាង	អស់អត្ថលើសគេ	ចេះឯងក្រែងគេ
	ទើបហៅអស់អត្ថ ។
តម្លៃព្យញ្ជនៈ	រៀបរាប់បញ្ជាក់	ជូនដោយកាត់ៗ
សូមស្លេះបញ្ចប់	ដោយក្តីប្រតិបត្តិ	កណ្តាលយប់ស្ងាត់
	ប៉ុណ្ណេះឯងហោង ៕