ពាក្យពុកផ្តាំទុកតាមព្យញ្ជនៈ

ទស្សនាថ្ងៃនេះ: 10

បទពាក្យប្រាំពីរ

ពាក្យពុកផ្តាំទុកតាមតួ ក	កូនល្អ កាន់កាប់សព្វកិច្ចការ
កូនកុំ កោងកាចកាងឫស្យា	កូនត្រូវ ការពារកេរ្តិ៍ម៉ែពុក ។
ពាក្យពុកផ្តាំទុកតាមតួ ខ	កូនល្អ ខិតខំសន្សំសុខ
កូនកុំ ខិលខូចនាំកើតទុក្ខ	កូនត្រូវ ខំទុកខាងមុខឆ្ងាយ ។
ពាក្យពុកផ្តាំទុកតាមតួ គ	កូនល្អ គិតគូរគួរគន់ម្តាយ
កូនកុំ គិតខ្លីស្តីរាយមាយ	កូនត្រូវ គិតឆ្ងាយទើបគប្បី ។
ពាក្យពុកផ្តាំទុកតាមតួ ឃ	កូនល្អ ឃើញឃោរឃាតអប្រិយ
កូនកុំ ឃុបឃឹតពិតចង្រៃ	កូនត្រូវ ឃ្មាតខ្មីឆ្ងាយឃោរឃៅ ។
ពាក្យពុកផ្តាំទុកតាមតួ ង	កូនល្អ ងាករេបែររកផ្លូវ
កូនកុំ ងងឹតគិតង៉ែង៉ូវ	កូនត្រូវ ងើបងូតជូតខ្លួនឯង ។
ពាក្យពុកផ្តាំទុកតាមតួ ច	កូនល្អ ចូរចេះចាប់ចាត់ចែង
កូនកុំ ចរចាចាកកោតក្រែង	កូនត្រូវ ចាត់ចែងចាំតាមចាស់ ។
ពាក្យពុកផ្តាំទុកតាមតួ ឆ	កូនល្អ ឆ្លើយឆ្លងគួរឆ្លាតឆ្លាស
កូនកុំ ឆោតឆៅឆ្លើយផ្តេសផ្តាស	កូនត្រូវ ឆ្លាក់ឆ្លាស់កុំឆ្លេឆ្លា ។
ពាក្យពុកផ្តាំទុកតាមតួ ជ	កូនល្អ ជួយជាតិជួយសាសនា
កូនកុំ ជិះជាន់ញាតិសាច់សា	កូនត្រូវ រក្សាជាតិសាសន៍ឯង ។
ពាក្យពុកផ្តាំទុកតាមតួ ឈ	កូនល្អ ឈានឈោងកុំតោងឆ្វេង
កូនកុំ ឈូឆរឆោតវង្វេង	កូនត្រូវ ឈប់លេងល្បែងអប្រិយ ។
ពាក្យពុកផ្តាំទុកតាមតួ ញ	កូនល្អ ញញឹមសមប្រិមប្រិយ
កូនកុំ ញៀនញ៉ាមតៀមស្រាស្រី	កូនត្រូវ ឃ្មាតខ្មីច្នៃការងារ ។
ពាក្យពុកផ្តាំទុកតាមតួ ដ	កូនល្អ ដើរដេកដឹងវេលា
កូនកុំ ដុកដាន់ដាក់ដូនតា	កូនត្រូវ ដឹងការណាគប្បី ។
ពាក្យពុកផ្តាំទុកតាមតួ ឋ	កូនល្អ ឋិតថេរលើឋានថ្មី
កូនកុំ ធុញថប់តបគុណថ្លៃ	កូនត្រូវ រំពៃថែឋានដើម ។
ពាក្យពុកផ្តាំទុកតាមតួ ឌ	កូនល្អ ប្រឌិតគិតឱ្យឆ្នើម
កូនកុំ ឌឺដងអ្នកផងឆ្អើម	កូនត្រូវ ដាំដើមដាក់ដល់ដី ។
ពាក្យពុកផ្តាំទុកតាមតួ ឍ	កូនល្អ ធំធាត់វិវឌ្ឍន៍ថ្មី
កូនកុំ ធុញថប់ស្អប់ក្រក្រី	កូនត្រូវ សួរស្តីន័យធូរស្តាប់ ។
ពាក្យពុកផ្តាំទុកតាមតួ ណ	កូនល្អ ណែនណាន់តាន់ចំណាប់
កូនកុំ ចំណាយចាយចែវច្បាប់	កូនត្រូវ ចំណាប់ចាប់ចំណាន ។
ពាក្យពុកផ្តាំទុកតាមតួ ត	កូនល្អ តបគុណកុំតឹងតាន
កូនកុំ តោះតើយអង្គើយខាន	កូនត្រូវ ស្គាល់ដានស្ពានជីវិត ។
ពាក្យពុកផ្តាំទុកតាមតួ ថ	កូនល្អ ថ្លាថ្លែងចូរថ្លឹងគិត
កូនកុំ ថ្លាថ្លែងខ្វែងគំនិត	កូនត្រូវ ប្រៀងប្រិតរឹតតឹងរ៉ឹង ។
ពាក្យពុកផ្តាំទុកតាមតួ ទ	កូនល្អ ទន់ភ្លន់ធន់រឹងប៉ឹង
កូនកុំទាស់ទែងរឹងទទឹង	កូនត្រូវ យល់ដឹងទោសទាស់គ្នា ។
ពាក្យពុកផ្តាំទុកតាមតួ ធ	កូនល្អ ធំធាត់មានធូរធារ
កូនកុំ ធ្លុះធ្លាយចាយខ្ជីខ្ជា	កូនត្រូវ ធានាថែទ្រព្យធន ។
ពាក្យពុកផ្តាំទុកតាមតួ ន	កូនល្អ និត្យនៅត្រូវគយគន់
កូនកុំ និន្ទាឈ្នានីសជន	កូនត្រូវ គិតគន់មុននិន្ទា ។
ពាក្យពុកផ្តាំទុកតាមតួ ប	កូនល្អ បោះបង់បាបវេរា
កូនកុំ បំបាត់កេរ្តិ៍មេបា	កូនត្រូវ រក្សាបទបណ្តាំ ។
ពាក្យពុកផ្តាំទុកតាមតួ ផ	កូនល្អ ផូរផង់ផ្ចង់ចងចាំ
កូនកុំ ផ្តាច់ផ្តិលពាក្យផ្តែផ្តាំ	កូនត្រូវ ផ្សែផ្សាំផ្សះផ្សាចិត្ត ។
ពាក្យពុកផ្តាំទុកតាមតួ ព	កូនល្អ ពោលពាក្យចូរពោលពិត
កូនកុំ ពោលពាក្យប៉ះពាល់មិត្រ	កូនត្រូវ ពោលពិតពេញប្រពៃ ។
ពាក្យពុកផ្តាំទុកតាមតួ ភ	កូនល្អ មានភ័ព្វភប់ភក្តី
កូនកុំ ភូតភរនាំភិតភ័យ	កូនត្រូវ ភក្តីស្តីចរចា ។
ពាក្យពុកផ្តាំទុកតាមតួ ម	កូនល្អ មាំមួនមានមេត្តា
កូនកុំ មើលងាយមិត្រមីងមា	កូនត្រូវ ម្នីម្នាមើលថែម៉ែ ។
ពាក្យពុកផ្តាំទុកតាមតួ យ	កូនល្អ ត្រូវយល់យើងជាខ្មែរ
កូនកុំ យាយីជិះជាន់គេ	កូនត្រូវ រិះរេយល់គល់ច្បាប់ ។
ពាក្យពុកផ្តាំទុកតាមតួ រ	កូនល្អ រស់រៀនមានរបៀប
កូនកុំ រឹងរូសហួសសុភាព	កូនត្រូវ រាបទាបរស់ទន់ភ្លន់ ។
ពាក្យពុកផ្តាំទុកតាមតួ ល	កូនល្អ លះបង់ចិត្តលោភលន់
កូនកុំ លួចលាក់ឆាបឆក់ប្លន់	កូនត្រូវ រូសរាន់គេចលិចលង់ ។
ពាក្យពុកផ្តាំទុកតាមតួ វ	កូនល្អ វាងវៃថ្លៃផូរផង់
កូនកុំ វង្វេងភ្លេចពូជពង្ស	កូនត្រូវ ស្មោះត្រង់នឹងវត្តវ៉ា ។
ពាក្យពុកផ្តាំទុកតាមតួ ស	កូនល្អ តស៊ូសូត្រសិក្សា
កូនកុំ សូញសាញក្រាញសាលា	កូនត្រូវ ឧស្សាហ៍សាងសុខសាន្ត ។
ពាក្យពុកផ្តាំទុកតាមតួ ហ	កូនល្អ ហាត់ពត់លត់ដំប្រាណ
កូនកុំហឺហាហួសប្រមាណ	កូនត្រូវ ក្លាហានហ៊ានពុះពារ ។
ពាក្យពុកផ្តាំទុកតាមតួ ឡ	កូនល្អ ឡើងបុណ្យឡើងការងារ
កូនកុំ ឡិមឡុមឡិបកិបគ្នា	កូនត្រូវ លុះលាការកោងកាច ។
ពាក្យពុកផ្តាំទុកតាមតួ អ	កូនល្អ អត់ឱនឱ្យមានប្រាជ្ញ
កូនកុំ អេចអូចដូចមាត់ដាច់	កូនត្រូវ អង្គអាចឱ្យអស់អត្ថ ។
ពាក្យពុកផ្តាំទុកទាំងអស់នេះ	កូនគួរត្រិះរិះឱ្យមធ្យ័ត
នឹងបានជាទ្រព្យគាប់ពេកក្តាត់	ទុកជាសម្បត្តិសម្បែងធន ។
ច្នេះហើយសូមអស់កូនប្រុសស្រី	គប្បីឃ្មាតខ្មីកុំទម្រន់
គិតគូរលៃលករាវរកទុន	ជាសម្បត្តិធនអង្វែងហោង ៕