| គ្រប់វិនាទីដែលឈានទៅមុខ | នាំយកសុខ-ទុក្ខទៅគ្រប់ដង្ហើម |
| រុក្ខាក្រៀមស្វិតត្បិតឃ្លាតសន្សើម | អ្នកភ្លេចរឿងដើមព្រោះមានរឿងថ្មី។ |
| កន្លង់ឃ្លាតផ្កាព្រោះអស់ទឹកដម | ស្នេហ៏លែងថ្នាក់ថ្នមព្រោះអស់ភក្តី |
| ភ្លេចពាក្យសម្បត់ព្រោះក្បត់សម្តី | ច័ន្ទឃ្លាតរាត្រីព្រោះតែរាហ៊ូ។ |
| សមុទ្ទមិនស្ងាត់ព្រោះមានរលក | បុព្វេសាងមកទើបបានជាគូ |
| អស់ក្តីសង្ឃឹមព្រោះឃ្លាតតស៊ូ | អ្នករៀនឃ្លាតគ្រូព្រោះមានឧបសគ្គ។ |
| ចិត្តធ្លាប់ស្មោះសល្អជាអនេក | ប្រែប្រួលថ្ងៃស្អែកក៏ព្រោះតែប្រាក់ |
| លោភលន់វង្វេងព្រោះតែមោហៈ | ខូចខាត់គ្រោះថ្នាក់ព្រោះតែកំហឹង។ |
| កើតក្តីលំអៀងព្រោះមិនលំអិត | ធ្ងន់តែម្ខាងពិតត្បិតព្រោះមិនថ្លឹង |
| បោះបង់ចោលសាច់ព្រោះតែហេតុឆ្អឹង | អ្នកកើតក្រោធខឹងព្រោះឃ្លាតខន្តី។ |
| ដើរដួលមិនក្រោកព្រោះឃ្លាតព្យាយាម | ពលចាញ់សង្រ្គាមព្រោះគ្មានអីឆី |
| ឥតធម៌មេត្តាឃ្លាតត្រាប្រណី | ធ្លាក់អវិចីព្រោះឃ្លាតកុសល។ |
| គ្មានក្តីសុខស្ងប់ព្រោះស្អប់ធម្មា | គ្មានការបូជាព្រោះមិនជឿផល |
| ចិត្តវល់ងាយមាយព្រោះមិនតម្កល់ | ឃ្លាតចាកមគ្គផលព្រោះតែប្រមាទ។ |
| ទិដ្ឋិចាក់ស្រេះព្រោះឃ្លាតបញ្ញា | ជាខ្ញុំតណ្ហាព្រោះចិត្តមិនស្អាត |
| មិនធ្វើ ទាន-សីលព្រោះតែមិនឆ្លាត | ធម៌មិនសង្វាតព្រោះតែស្រវឹង។ |
| មិនរួចពីទុក្ខព្រោះអវិជ្ចា | ជាប់ ជាតិ-ជរាព្រោះតែមិនប្រឹង |
| សម្បុរអាក្រក់ព្រោះតែក្រោធខឹង | វិញ្ញូចេះដឹងព្រោះថ្លឹងបានស្មើ។ |
| ធម៌កើតពីចិត្តព្រោះចិត្តប្រធាន | បានសួគ៌និព្វានព្រោះចិត្តប្រសើរ |
| ចិត្តស្ងប់យល់ជាក់ត្រៃលក្ខណ៍ដំណើរ | ចិត្តមិនហោះហើរតាមលោកធម៌។ |
| ម្លប់ឈើត្រជាក់តែងទាក់អ្នកជ្រក | ចិត្តមានជម្រកព្រោះមិនញាប់ញ័រ |
| ចេញផុតពីព្រៃមិនភ័យជាប់ជ័រ | ព្រោះចិត្តយល់ធម៌ៗទ្រទ្រង់ចិត្ត។ |
| រីជនក្នុងលោកប្រុស-ស្រីឯណា | អ្នកមានប្រាជ្ញាជ្រះថ្លាពិសិដ្ឋ |
| ញាំងប្រាណអោយឆ្ងាយអបាយទុច្ចរិត | ផលតែងថេឋិតសោយសិដ្ឋសួគ៌ា។ |
| អ្នកស្វែងរកផ្លូវត្រឹមត្រូវសុចរិត | ព្យាយាមប្រព្រឹត្តិតាមក្រឹត្យធម្មា |
| ព្រះពុទ្ធឳវាទស្អាតមានសទ្ធា | តែងនាំអង្គារួចចាកអបាយ។ |
| ត្បិតសត្តបានសុខស្រណុកលោកីយ៍ | ព្រោះស្អាតផ្លូវបី វចី-ចិត្ត-កាយ |
| បរិសុទ្ធជ្រះថ្លាកន្តារវែងឆ្ងាយ | សោយសុខសប្បាយក្នុងលោកទាំងពីរ។ |
| ស្រូវមានផលល្អអាស្រ័យខេត្តា | អ្នកធ្វើឧស្សាហ៍បោចស្មៅដាក់ជី |
| ទប់ភ្លឺឲ្យមាំថែទាំវារី | កបដោយកិច្ចពីរនោះទើបប្រសើរ។ |
| ធម្មប្រទីបហើយនិងជីវិត | ជាគូគ្នាពិតស្និទ្ធតាមដំណើរ |
| ជីវិតមានធម៌ពិតជាប្រសើរ | លំអានដំណើរនៃជនបណ្ឌិត។ |
| ជនស្អប់ផ្លូវល្អព្រោះក្របញ្ញា | ស្អប់ការសិក្សាព្រោះខ្លីគំនិត |
| ខ្លៅមិនចេះដឹងប្រឹងធ្វើបណ្ឌិត | អ្នកមានទ្រព្យពិតព្រួយចិត្តរក្សារ។ |
| សម្បត្តិជិតឆ្ងាយទាំងឡាយក្នុងលោក | ក្រាស់ក្រែលគគោកភោគច្រើនយ៉ាងណា |
| មិនអាចប្រៀបស្មើនិងទ្រព្យបញ្ញា | បូរាណលោកថាចារទុកយូរយា។ |
| ញាំងបុត្តប្រុស-ស្រីឲ្យប្រឹងសូត្ររៀន | ចំណេះរបៀនសព្វមុខវិជ្ជា |
| សិល្បៈសាស្រ្តា-ភាសានានា | ផុតអវិជ្ជាក្នុងនាលោកីយ៍៕ |
ភូមិបឹងឡែង ឃុំជ្រៃឃ្មុំ ស្រុកស៊ីធរកណ្តាល ខេត្តព្រៃវែង
ថ្ងៃ១២កើតខែភទ្របទ ឆ្នាំថោះ ព.ស. ២៥៦៧
ត្រូវនឹងថ្ងៃអង្គារ៍ ទី២៦ខែកញ្ញា ឆ្នាំ២០២៣
យឿង-ស្រស់
🔸Last Updated កំណែចុងក្រោយ on August 8, 2024
Facebook Comments
