ឆ្កួតបីប្រការ

ទស្សនាថ្ងៃនេះ: 28

Posted by:

Johnny ចន្នី

បទកាកគតិ

– បូរាណព្រេងព្រឹទ្ធពិតពោលថា	ឆ្កូតមួយនោះណាគឺឆ្គួតស្រី
ទីពីរឆ្កួតស្រាកញ្ឆាក្តី	ឯឆ្កួតទីបីគឺឆ្កួតល្បែង ។
– ប្រការទាំងបីតោងជំរះ	ព្រះពុទ្ធជាម្ចាស់ទ្រង់សំដែង
ជនសេពអបាយមុខនោះឯង	លោកថ្លែងថាតែងតែវិនាស ។
– ជំពូកឆ្កួតស្រីលោកស្តីថា	ជនល្មោភកាមាអាសអាភាស
វង្វេងតណ្ហាស្នេហ៍ពោរពាស	រោគនោះគួរចៀសវៀងឱ្យបាន ។
– ធម្មជាតិបណ្តុះមនុស្សប្រុសស្រី	ឱ្យរួមនិស្ស័យតសន្តាន
តែមនុស្សប្លែកខុសពីតិរច្ឆាន	ពោលគឺស្នេហ៍បានតែគូមួយ។
– ជនខ្លះប្រែផ្លាស់ខុសក្រមក្រិត្យ	ល្មោភរោគស្នេហ៍ស្និទ្ធឥតគិតព្រួយ
ប្រពន្ធមានដែរតែមិនស្ទួយ	មាសប្រាក់ចែកជួយស្រីមួយផ្សេង។
– ស្រីមួយមិនស្កាំប្រាំមិនស្កប់	ផ្លាស់ប្តូរមិនចប់ឡប់វង្វេង
ឃើញថ្មីភ្លេចចាស់ផ្លាស់រកក្មេង	ស្រីលាបម្សៅប្រេងផ្តូចទេវតា។
– ឯស្រីល្អពិតចិត្តឥតល្អក់	ដៀលថាអាក្រក់ខ្ពើមរអា
ដ្បិតគិតថែស្ងូនកូនធីតា	ភ្លេចស្អាងកាយាសំរាប់ប្តី ។
– ខ្លះទៀតប្រើស្នៀតភរមុសា	បំផ្លាញប្រហារព្រហ្មចារស្រី
បំផុតស្មាមួយអំរែកបី	នោះនឹងកើតក្តីមិនចេះចប់ ។
– អាងឫកអាងរាងរូបសង្ហា	ប្រាថ្នាសង្សារសឹងបួនដប់
លោភលន់តណ្ហាមិនធុញថប់	មិនស្កប់ហ៊ានលបប្រពន្ធគេ ។
– ចាស់ថាលួចបាននោះវាគ្រាន់	បើម្ចាស់គេទាន់ជាន់ទោសទ្វេ
ជ្រុលស្លាប់សឹងច្បាប់មិនគ្នាន់គ្នេរ	សិទ្ធិលើប្តីគេជំរះក្តី ។
– ខ្លះទៀតនាំមករោគរាគត្បាត	បំពានប្រមាថលើ សិរី
អាចឱ្យខ្វាក់ភ្នែកខ្វិនជើងដៃ	ជម្ងឺអប្រីយ៍ឆ្លងកូនចៅ ។
– រោគនេះកំណាចកាចឫស្យា	ផ្តល់ឱ្យគ្រួសារកើតសោកសៅ
រីឯប្រពន្ធកូនដំបៅ	ឆ្លងតពូជផៅរងគ្រោះភ័យ ។
– ខ្លះអាងមាសប្រាក់បុណ្យស័ក្តិខ្ពស់	លក់សព្វកិត្តិយសព្រោះតែស្រី
ចាត់ទុកភរិយាជាទាសី	ឃ្នើសចិត្តជេរស្តីអាងលែងលះ។
– អាងនាងឆើតឆាយរំសាយចិត្ត	ដើរដេកភ្លេចគិតឥតចូលផ្ទះ
បិទសិទ្ធិប្រពន្ធមិនឱ្យឈ្នះ	វាយដំច្រំទះខ្វះមេត្តា ។
– ជូននាំឆើតឆាយមកដល់ផ្ទះ	បង្គាប់ឱ្យព្រះសំពះខ្លា
ឱ្យកូនបំរើស្រីពេស្យា	បំប៉នអាហារបំពេញចិត្ត ។
– បុ្រសថោកចាញ់បោកស្រីឆើតឆាយ	កាន់ក្បាលជេរម្រ៉ាយក៏មិនគិត
លុះអស់ប្រាក់កាសនាងផ្លាស់ចិត្ត	ឆើតឆាយកៀកស្អិតសាហាយថ្មី។
– វិលរកឆ្នាំងចាស់មុខក្រាស់ឃ្មឹក	ម្ល៉េះព្រះគង់នឹកថាជាប្តី
ត្រកងឱបទៀតដោយខន្តី	ស៊ូបន្ទោសស្តីព្រហ្មលិខិត ។
– តម្រាប់បែបនេះកូនមើលចុះ	កើតជាបុរសកុំប្រព្រឹត្ត
គួរស្អប់គួរខ្ពើមគួរកុំស្និទ្ធ	កូនអើយនោះពិតហៅឆ្កួតស្រី។
– ជំពូកទីពីរគឺឆ្កួតស្រា	នឹងនាំអាត្មាធ្លាក់អវីចី
ស្រវឹងកាលណាក្លាសំដី	ឫកស្មើដំរីស្តីប៉ោឡែ ។
– មើលប្រពន្ធខ្លួនដូចបច្ចា	មើលនាងលក់ស្រាដូចព្រះម៉ែ
ដឹងគុណដបស្រាជាងដីស្រែ	ស្រឡាញ់អ្នកស្នេហ៍ជាងអ្នកស្និទ្ធ។
– បានស្រាចិញ្ចើមសម្បើមយ័ក្ខ	អូតអាងទាត់ធាក់អាងស្បែកស្វិត
មិនខ្លាចពូថៅខ្វែវកាំបិត	មើលអ្នកផងល្អិតប៉ុនមេដៃ ។
– ពេលទទឹកស្លាបដាបអាត្មា	សម្បើមវោហារដូចខ្លាព្រៃ
ចំអាសចំអូមឥតសំចៃ	ពាក្យពេចន៍ព្រៃផ្សៃអសោចកេរ្តិ៍។
– ឡូឡាឡកច្រៀងតាមដងផ្លូវ	ញាតិផងមិនសូវចូលចិត្តទេ
អ្នកខ្លះស្អប់ណាស់លបលួចជេរ	ដៀលពូជបាមេបង្កើតកាយ ។
– ពូកែខ្លាំងណាស់ប៉ះរឿងឈ្លោះ	ទោះនឹងស្លប់រស់ក៏មិនស្តាយ
បើសិនចាញ់ខាងកម្លាំងបាយ	នៅអាងជេរម្រ៉ាយស្តីបញ្ចោរ ។
– ខ្លះស្រវឹងខ្លាំងស្រវាំងអាប់	ស្លេកស្លាំងសឹងស្លាប់ភ្នែកស្លក់ស្លោ
ប្រមឹកដើរក្អួតដេកចង្អោរ	របូតអាវខោក៏មិនដឹង។
– រួសរាយតែមាត់ធាត់តែមុខ	សាច់ដូចឧសពុកស្គមកំព្រឹង
មុខហើមដូចហែកស្បែកត្រីខ្ជឹង	ប៉ុណ្ណឹងគង់ប្រឹងមិនចុះចាញ់ ។
– មានប្រាក់ក្លើម្រាក់ព្រួតគ្នាឆី	ផឹកជក់បារីក្លែមសាច់ឆ្ងាញ់
អ្នកផ្ទះលីងបាយលាយកាកខ្លាញ់	ខ្ពស់ណាស់ក្រឹមក្រាញ់យូរៗម្តង។
– ពេលអស់លុយផឹកនឹកមួម៉ៅ	វាយសព្វកូនចៅស្តីជេរផង
ខឹងចិនមិនជឿជំពាក់ម្តង	ក្របីគោផងហ៊ានលក់ផឹក ។
– មានប្រាក់កាលណាថ្លាគំនិត	ប្រមូលញាតិមិត្តហ្វូងប្រមឹក
នាំគ្នាស៊ីក្លែមថែមសន្ធឹក	សើចហ៊ោរគគ្រឹកផឹកស្រង់ដើម។
– ទោះអស់ប៉ុន្មានក៏មិនគិត	អាមួយឈរជិតសាច់សថ្លា
អរណាស់កូនចិនអងែ្អលស្មា	ផឹកដួលត្រៀបត្រាបង្អូតចិន។
– ប្រាក់មានប៉ុន្មានជូនទាំងអស់	មិនស្តាយរបស់ត្រូវហោចហិន
ទូទាត់សេសសល់ផ្ញើទុកសិន	សំពះចឹកចិនមិនភ្លេចគុណ ។
– ដល់ផ្ទះខំអួតស្រែកក្តែងៗ	ថានែ អើឯងកូនប្រពន្ធ
អញផឹកថ្លៃថ្នូរគួរគយគន់	ទោះដាបទោរទន់ដើរខ្លួនឯង។
– លុះចូលជើងក្រានឆ្នាំងទទេ	ខឹងណាស់ស្រែកជេរឥតគិតក្រែង
បោកតុទូតាំងឆ្នាំងអំបែង	យំសើចម្នាក់ឯងរំខានញាតិ ។
– ប្រមឹកអ្នកក្រុងខុសអ្នកស្រែ	បនបារញ៉ាំញ៉ែយប់អាធ្រាត្រ
ស្រីញីក្តិចខ្ញាំចាំព្រោងព្រាត	រាំរែកបញ្ច្រៀតឆ្លៀតបិចបោច ។
– ស្រាបៀរកំប៉ុងបារាំងចិន	បញ្ចុកមាសឆ្អិនស្រីអសោចិ៍
ផឹកក្លែមថ្ពាល់ស្រីសំដីខ្មោច	ទ្រព្យធន់ហិនហោចបង់អសារ ។
– ប្រពន្ធទូលច្រែងលក់ត្រកួន	លោកប្តីលេងខ្លួនចាយដុល្លារ
កូនខ្វះស្សែកជើងចូលសាលា	លោកឳចូលបារជិះរថយន្ត ។
– មិត្តភ័ក្តម្រាក់ក្លើដើរផឹកស៊ី	ពុលស្រាស្រីញីលក់ទ្រព្យធន
លួចលាក់បញ្ចាំចាយអស់ទុន	ក្បត់កូនប្រពន្ធផ្គាប់ពួកម៉ាក់ ។
– ចុងក្រោយបង់បោយដើរដូចឆ្កួត	អស់អួតមុខស្ងួតធ្លាក់តោកយ៉ាក
អស់កេរអស់ផ្ទះអស់មិត្តម៉ាក	ញាតិផងស្តោះខាកខ្ពើមឫកពា។
– ខកខ្លួនលិចលង់ក្នុងអបាយ	អង្គុយនឹកស្តាយក្លាយលីលា
ផ្តល់ទុក្ខទារុណកូនភរិយា	សោតសឹងបូជាខ្លួនឱ្យក្ស័យ ។
– កូនអើយនោះហើយហៅឆ្កួតស្រា	ចាំជាប់ចិន្តាអចិន្រ្តយ៍
បើចៀសវាងបានប្រាណថ្លាថ្លៃ	ទើបឈ្មោះប្រពៃពេញជាប្រុស។
– កុំបន្ថោកពូជបង្ខូចពង្ស	នាំខ្លួនលិចលង់ក្នុងកំហុស
មនុស្សថ្លៃជាងស្រាណាកូនប្រុស	កុំបន្ទាបឈ្មោះថោកជាងស្រា។
– កូនអើយសុរាជាឱសថ	តាមក្បួនកំណត់គ្រូដូនតា
តែស្រាពិសពុលកាចឫស្យា	អាចបែរប្រហារសង្ខារបាន ។
– បើផឹកសន្ធិកហួសកំណត់	នោះស្រាឱសថថ្នាំបូរាណ
កា្លយជាអាវុធដុតរោលប្រាណ	គ្រោះថ្នាក់សាមាន្យមើលមិនជា។
– ក្រពះពោះវៀនមានដំបៅ	សួតថ្លើមផ្សាក្តៅឈឺគ្រាំគ្រា
ខូចខួរប្រសាទកា្លយលីលា	នេះពុកផ្តាំភា្ងជាកូនប្រុស ។
– ឯឆ្កួតទីបីល្បែងពាលា	អាប៉ោងប៉ោបៀជាកំហុស
ជនដែលប្រព្រឹត្តពិតជាខុស	ចូរចាំទុកចុះប្រុសនិមល ។
– អ្នកចាញ់គេព្រឹកនឹកស្រមៃ	សងសឹកពេលថ្ងៃលែងអីជល់
អ្នកឈ្នះចង់លះដល់ឫសគល់	មិនក្រែងលេងជ្រុលចាញ់វិញអី។
– គេថាសេះដាច់យកសេះតាម	មិនខ្លាចរហាមធ្លាក់ក្រក្រី
ចាញ់លុយមិនឱ្យចាញ់ចិត្តអី	ពាក្យពួកគេស្តីមិនគួរស្តាប់ ។
– ពួកនោះបើឈ្នះមុខឡើងខ្លាញ់	តែបែរបើចាញ់មុខដូចស្លាប់
បានឈ្នះខំអួតឱ្យគេស្តាប់	បើចាញ់មិនប្រាប់ខ្លាចអាប់មុខ ។
– ជួនពេលព្រលប់ស្រស់ប៉ប្រិម	លុះពេលព្រលឹមស្អុយគគ្រុក
ជួនព្រឹករីករាយល្ងាចកើតទុក្ខ	អ្នកល្បែងឃើញមុខងាយចំណាំ។
– ចំណុចម្យ៉ាងទៀតឆ្លៀតសំគាល់	អ្នកលេងរៀងរាល់វាល់ខែឆ្នាំ
កម្រឃើញធាត់សាច់ក្រម៉ាំ	ច្រើនរោគរ៉ៃរ៉ាំស្គាំងស្គមប្រាណ ។
– ដ្បិតបាយមិននឹកទឹកមិនស្រែក	សោតទាំងដំណេកក៏មិនបាន
ជក់ដៃទោះថ្ងៃយប់ថ្មើរម៉ាន	សឹងសូន្យទាំងប្រាណក៏មិនខ្លាច។
– របរនេះឯងរែងអំពល់	បាឈ្លក់ងប់ងល់ជ្រុលបែកប្រាជ្ញ
ចាញ់បង់លង់ខ្លួនជួនលែងខ្លាច	ប្រព្រឹត្តកោងកាចហ៊ានលួចឆក់។
– ក្លាយខ្លួនធ្វើចោរចិត្តឫស្យា	ហ៊ានកាប់ប្រហារបោកកុហក
ចាញ់ល្បែងឈឺចិត្តគិតខ្វលខ្វក់	សាងកម្មអាក្រក់ចិត្តអប្រីយ៍ ។
– ឯអ្នកជើងល្បីលេងល្បែងឈ្នះ	កម្រឃើញណាស់ផ្ទះសងថ្មី
ឮតែប្រពន្ធដៀលជេរស្តី	ជួនអីស្រីៗគេសុំលែង ។
– កួនអើយអ្នកល្បែងរែងមុខក្រាស់	ហ៊ានកាត់កេរ្តិ៍ខ្មាស់ចេះទ្រាំទ្រែង
លួងលោមញាតិមិត្តឥតប្រជែង	បើឈ្លោះទាស់ទែងក្រែងខាតលាភ។
– ហោប៉ៅមានប្រាក់ពាក់មុខខ្លា	គ្មានលុយកាលណាមុខសុភាព
សំពះគេឯងរែងថោកទាប	ដាក់ខ្លួនដុនដាបដើរបុលខ្ចី ។
-លុះគេទារប្រាក់ស្ទាក់ប្រពន្ធ	គ្មានសោះទ្រព្យធន់អត់សល់អ្វី
មានតែខ្លួនប្រាណសាច់សខ្ចី	សងគេជួសប្តីខ្ចីជំពាក់ ។
– ឯជនជាវែកមិនដឹងខ្យល់	ឃើញគេមកដល់ហៅអាម្រាក់
គេថាអាណិតណាស់មិត្តភ័ក្តិ	លុយខ្ចីជំពាក់ឯងកុំភ័យ ។
– អញជួយសង្គ្រោះព្រោះឯងចាញ់	សូមក្លើសម្លាញ់កុំសងអី
វែកឮដូច្នេះអរប្រិមប្រិយ	សុំរាប់លុះក្ស័យមិនភ្លេចគុណ។
– នោះឯងឆ្កួតល្បែងវាវិនាស	ហិនហោចប្រាក់មាសអស់ទ្រព្យធន
ខូចអនាគតកូនប្រពន្ធ	ផ្តល់ទុក្ខទោសធ្ងន់កើតខ្វល់ខ្វាយ។
– កូនអើយឈ្មោះថាល្បែងស៊ីសង	គួរដើរកន្លងចៀសឱ្យឆ្ងាយ
គ្រប់ល្បែងល្បងភ្នាល់រាល់អបាយ	សុទ្ធសឹងអន្តរាយដល់អាត្មា ។
– នេះពុកផ្តាំទុកតរៀងទៅ	ពេលពុកមិននៅឃ្លាតធីតា
កូនកុំបន្លែងល្បែងស្រីស្រា	ឆ្កួតបីប្រការហៅទុច្ចរិត ។
– ពុកលើករឿងមួយមកពណ៍នា	ជាតិសាសន៍ឥណ្ឌាបានប្រឌិត
តាមពាក្យដំណាលថារឿងពិត	និងថ្លែងនិមិត្តតាមសាវតារ ។
– មានគ្រួសារមួយត្រកូលខ្ពស់	ដើមឡើយគាប់យសសេដ្ឋីមហា
សម្បត្តិភោគទ្រព្យគាប់ចិន្តា	មានប្រាក់ស្រែច្បារមិនខ្វះអ្វី ។
– ក្រោយមកក៏ធ្លាក់ដាក់ដុនដាប	ដោយអំពើបាបរបស់ប្តី
សេពគប់ជំពប់មិត្តអប្រីយ៍	ប្រព្រឹត្តស្រាស្រីល្បែងពាលា ។
– ហិនហោចសម្បត្តិផ្ទះសម្បែង	គ្រួសារលះលែងខ្វែងចិត្តគ្នា
ប្តីរស់ជាមួយក្រុមចោរមារ	ប្រពន្ធវេទនានិងកូនស្រី ។
– រហាមដេកតាមចិញ្ចើមថ្នល់	ទុក្ខព្រួយកង្ខល់ហួសស្រដី
ជីវិតម្តាយរស់ព្រោះកូនស្រី	ស្វែងរកកម្រៃធ្វើខ្ញុំគេ ។
– ថ្ងៃមួយរូបនាងរងគ្រោះថ្នាក់	ដោយពួកពាលស្ទាក់ចាប់មាសមេ
ស្របម្តាយឈីធ្ងន់ទុក្ខគ្នាន់គ្នេរ	យំអង្វរគេ គេមិនស្តាប់ ។
– ឃើញពាលរំលោភកូននឹងមុខ	ទ្រូងម្តាយចាប់ចុកដាច់ខ្យល់ស្លាប់
ពាលឥតខ្មាសអៀនគ្មានឈឺចាប់	ប្រញាប់បង្ខំនាំនាងទៅ ។
– លុះដល់គ្រឹះស្ថានផ្ទះសំណាក់	ដែលពួកពាលស្នាក់រស់និត្យនៅ
មេចៅហ្វាយធំចិត្តឃោរឃៅ	នឹកស្មានបានស្មៅឆ្ងាញ់ពិសា ។
– ស្រាប់តែសម្រែកស្រែកហៅពុក	ទួញសោកនឹងមុខផ្ទាល់នេត្រា
យល់ជាក់ជាកូនស្ងួនធីតា	ទើបស្លុតអាត្មាវិលស្មារតី ។
– គ្រានេះឳពុកទុក្ខទោម្នេញ	អារម្មណ៍វង្វេងលែងយល់អ្វី
រន្ធត់តក់ស្លុតផុតប្រក្រតី	ឱនឱបកូនស្រីសើចលាយយំ។
– ស្ទុះទាញអាវុធមកកាន់ក្តាប់	បាញ់រះសម្លប់ពាលតូចធំ
ម្តងសើចម្តងហ៊ោខ្ទ័រព្រៃភ្នំ	ម្តងបែរស្រែកយំៗបោកខ្លួន ។
– នោះឯងប្រែកាយក្លាយវិកល	ចុកចាប់ខ្សាប់ខ្សល់ផលហុចផ្ទួន
សំពះសុំទោសកូនស្រីស្ងួន	ទើបប្រហារខ្លួនដោយខ្លួនឯង។
– នោះឯងលទ្ធផលបន្សល់ទុក	យល់ពិតនឹងមុខឃើញជាក់ស្តែង
ចេញពីប្រភពស្រីស្រាល្បែង	ឆ្កួតបីនោះឯងផ្តល់ទុក្ខា ។
-នេះពុកនិទានសងេ្ខបខ្លី	បញ្ជាក់អត្ថន័យពិតពិស្តារ
ចូរកូនពិនិត្យគិតខ្លឹមសារ	និងពិចារណាដល់ជីវិត ។
– កូនអើយស្កាល់ផ្លូវត្រូវនិងខុស	កើតមកជាប្រុសកុំភ្លេចគិត
កុំខ្ចាត់មារយាទឃ្លាតគំនិត	សន្សំសុចរិតកុំខិតឆ្ងាយ ។
-សំខាន់បំផុតការសេពគប់	ប្រយ័ត្នជំពប់ពាលអន្តរាយ
នាំខ្លួនលិចលង់ក្នុងអបាយ	គួរត្រាច់ផ្លូវត្រាយកុំលុកព្រៃ ។
– មុនដេកភ្នែកបិទគិតគូរនឹក	ភ្ញាក់មុនរលឹកទើបប្រពៃ
បើកូនខ្លាចខ្លាខំឆ្ការព្រៃ	នេះពុកពោលស្តីផ្តាំមាសស្ងួន ។