ចេះពីរៀន មានពីរក

ទស្សនាថ្ងៃនេះ: 70

Posted by:

Johnny ចន្នី

បទពាក្យ៧

– ចេះមកពីរៀនមានពីរក	ហៃស្ងួនពន្លកគ្រប់អង្គា
ពាក្យចាស់ពន្យល់រាល់វេលា	ឱ្យកូនគ្រប់គ្នាចងចាំទុក ។
– លោកថាចំណេះបានពីរៀន	នេះដំបូន្មានចំពោះមុខ
ចំណេះជួយ ឆ្លងចម្លងទុក្ខ	ចូរចាំទំនុកលោកស្រដី ។
– វិជ្ជាគឺជាឃ្លាំងសម្បតិ្ត	ចាយមិនចេះខ្ចាត់ទេពីសី
ចោរលួចមិនបាត់ទោះយប់ថ្ងៃ	ចរណៃចំណាំគឺវិជ្ជា ។
– ចំណេះអាចស្គាល់ពន្យល់ផ្លូវ	ស្គាល់ហេតុខុសត្រូវសព្វការងារ
បើមានឆន្ទៈខ្វះវិជ្ជា	ធ្វើអ្វីនានាច្រីនសៅហ្មង ។
– អវិជ្ជាងងឹតពិតដូចខ្វាត់	យល់ក្តីគ្រោះថ្នាក់ច្រីនកន្លង
សូន្យសុងលង់លិចភេ្លចឆ្គាំឆ្គង	សឹងសេពគប់ផងដោយបាបកម្ម ។
– ពាក្យពីបូរាណបានចងចារ	តំណដូនតាជាបណ្តាំ
ហៃមាសស្ងួនអើយចូរកូនចាំ	លោកផ្តាំភ្លើងភ្លឺគឺប្រាជ្ញា ។
– កកើតចំណេះគឺខិតខំ	សន្សំសង្វាតឆ្លាតសិក្សា
ប្រមូលតក់ៗឆក់តម្រា	មានលេខអក្ខរាជាប្រភព ។
– ចេះចាំកាលណាភ្លឺកាលនោះ	នាំខ្លួនផុតគ្រោះលែងធុញថប់
ភ្លឺអចិន្រ្តៃយ៍ទាំងថ្ងៃយប់	ឧបសគ្គសព្វគ្រប់ឈប់អំពល់ ។
– ពុកពោលរួចហើយឃា្លមួយថា	ចង់បានផ្លែផ្កាឱ្យដុតគល់
កូនអើយប្រឹងរៀនហ៊ានឈ្មុសឈ្មុល	ថ្ងៃមុខគង់យល់ដោយសម្បតិ្ត ។
– កំណប់មាសប្រាក់គឺសាលា	ត្រូវកាយកាប់ឆ្ការកុំស្ងៀមស្ងាត់
កូនចេះចាំហើយស្បើយវិបត្តិ	ទុក្ខព្រួយខ្ចាយខ្ចាត់ពីអាត្មា ។
– ក អ៊ើយកកើតជារូបកាយ	កូនកុំកាត់ឆ្ងាយពីកិច្ចការ
កាប់គាស់កុះករល្អកាយា	កេរកាលផ្តាំថាកុំកោងកាច ។
– ខ អ៊ើយខខំកុំខូចខិល	ខកខានប្រាណខ្ជិលវិលទាល់ប្រាជ្ញ
ខែងរ៉ែងក្រែងខុសឈ្មោះខូចកាច	ខិតខំខ្លបខា្លចអាចសុខា ។
– គ អ៊ើយគគួរចេះគិតគូរ	ចេះគាប់គុណគ្រូកុំគេចបា
កុំកួចគុំគួនកាន់មោហា	គេងគិតកិច្ចការគង់គប្បី ។
– ឃ អ៊ើយឃឃើញភាពឃោឃៅ	កុំទៅឃុបឃិតជិតគេអី
ជួយឃាត់មនុស្សឃាតឱ្យឃ្លាតភ័យ	កើតក្តីឃុំឃាំងទាំងអ្នកជួយ ។
– ង អ៊ើយងងឹតពិតដូចងោះ	ងប់ងុលជ្រុលជ្រួលព្រោះខ្វះព្រួយ
ងីងើងំៗយំរងួយ	ងើបងើយផុតត្រួយធ្លោយការងារ ។
– ច អ៊ើយចចាប់ចេះចាត់ចែង	ចាស់ៗលោកថ្លែងថាចិត្តជា
ចូលចិត្តចោទស្រាយចែកចាយគ្នា	ចាំចុះអ្នកជាចេះចចារ ។
– ឆ អ៊ើយឆឆោមកុំឆើតឆាយ	ឆុងឆាំងនាំកាយក្លាយប្រេះឆា
ឆិនឆៃដៃឆៅឆាប់ឈើផ្សា	កុំឆោតអាត្មាឆាបឆួលឆេះ ។
– ជ អ៊ើយជជួបជោគជយា	ជនជាតិអ្នកជាល្អពិសេស
មិនជេរជជែកស្រែកចចេស	ជួយជាតិប្រទេសមិនជិះជាន់ ។
– ឈ អ៊ើយឈឈានឱ្យលឿនឆាប់	ឈូឆរប្រញាប់ឈោងឱ្យទាន់
កុំឈៀងឈរឈប់ចង់ទប់ឈ្នាន់	ខំប្រឹងរួសរាន់ទាន់ឈឺចាប់ ។
– ញ អ៊ើយញញឹមកុំញញើត	កុំញាក់ញ័រព្រើតប្រឹងប្រញាប់
ញុះញង់ញឹកញាប់គាប់កុំត្រាប់	ញ៉េះញ៉ោះខុសច្បាប់នាំញាតិស្អប់។
– ដ អ៊ើយដឹងដល់សល់ដើមដាន	ដេកដើរប្រមាណដានប្រសព្វ
ដាំដុះដេរដាស់អស់ធុញថប់	ដូចដឹងដល់ដប់ឈប់ដុនដាប ។
– ឋ អ៊ើយឋឋិតក្នុងឋានសុខ	បឋមស្តម្ភស្តុករៀងដរាប
ឋានៈខ្ពង់ខ្ពស់ព្រោះគ្មានបាប	សាងបុណ្យឱ្យកា្របជួបសួគ៍ឋាន ។
– ឌ អ៊ើយឌឌឺឮប្រឌិត	ដៀមដាមញាតិមិត្តពិតរំខាន
ឌុកដាន់ឌឺដងសៅហ្មងប្រាណ	ដៀលខុសដើមដានគេផ្តន្ទា ។
– ឍ អ៊ើយឍធំជួបជុំញាតិ	វឌ្ឍនភាពជាតិឃ្លាតវេរា
ចាកផុតទុក្ខទោសព្យុះព្យោមារ	ឆ្លងកាលវឌ្ឍនាអភិឌវ្ឍន៍ ។
– ណ អ៊ើយណណាស់ប៉ះអ្នកណា	ដំណាងដួនតាចារទៀងទាត់
ដំណឹងតំណតប្រវតិ្ត	ដំណើរធំធាត់ដំណែលកេរ្តិ៍ ។
– ត អ៊ើយតតូចនៅតេះតះ	តោងតាមតាចាស់ណាមាសមេ
តូចតាចកុំតាំងខ្លាំងជាងគេ	តក់ៗគង់តែតាមគេទាន់ ។
– ថ អ៊ើយថថាឱ្យថែថួន	ថោកដៃថ្លៃខ្លួនលោកថាគ្រាន់
ថែកេរ្តិ៍ថេរថិតគិតគ្នេរគ្នាន់	កុំថប់ធុញទ្រាន់ចេះថែមថយ ។
– ទ អ៊ើយទទៅឱ្យទៀងទាត់	ទន្ទេញចាំមាត់ទើបមិនស៊យ
ទិសទីទើសទាល់កុំទៅញយ	ទាស់ទែងនាំឱ្យទុក្ខទោសា ។
– ធ អ៊ើយធធនធានធូរធារ	ធំធាត់សោភាសមប្រាថ្នា
សន្ធឹកសន្ធាប់គាប់ចិន្តា	សន្សំធម៌អាថ៍កុំធុញថប់ ។
– ន អ៊ើយននាងកុំទំនេរ	និត្យនៅរិះរេរៀនឱ្យចប់
នោះទើបនឹមនួនមានកំណប់	ន័យនេះជាទ្រព្យណានួនភ្ងា ។
– ប អ៊ើយបបោះបង់ឱ្យបាន	បែបបទសាមាន្យធ្វើបាបគ្នា
កុំបែកបែរបុណ្យគុណបុព្វជា	បីបមបុត្រភ្ងាជាប្រចាំ ។
– ផ អ៊ើយផផុសដុះផល្លា	បំផុតផ្លែផ្កាព្រោះប្រឹងដាំ
ភោគផលផូរផងផ្ចង់ផ្សែផ្សាំ	ផូងផាងផឹកញ៉ាំងផលមិនផេះ។
– ព អ៊ើយពពោលពាក្យឱ្យពិត	ដូចពេជ្រប្រណីតពេញពិសេស
កុំពានពួកពាលពុតមិនខ្មេះ	ពាក់ព័ន្ធពួកនេះខូចពូជពង្ស ។
– ភ អ៊ើយភរភូតនាំអភ័ព្វ	ភាន់ភាំងបង់ទ្រព្យមិនគាប់គង់
ភិតភ័យភោគផលផ្តល់លិចលង់	ពិភពល្ងិតល្ងង់កុំសំភី ។
– ម អ៊ើយមមានមិត្តចិត្តមួយ	មាំមួនមិនព្រួយមួយជីវី
មាសមេមើលមុខមុនមានពីរ	មោះមុតមូលមីរឱ្យម៉ឹងម៉ាត់ ។
– យ អ៊ើយយយាន្តស្ពានយិតយោង	យាងយាត្រកុំឃ្លោងយើងប្រយ័ត្ន
ប្រយោជន៍យឺនយូរគួរយាមស្កាត់	ប្រយែងប្រយ័ត្នយល់គ្រប់យ៉ាង ។
– រ អ៊ើយររស់រត់រករៀន	រិះរេរាប់អានញាតិជិតខាង
រួតរះរួសរាន់ទាន់សំណាង	រឹងរូសរ៉ូងរ៉ាងរែងរិចរិល ។
– ល អ៊ើយលលេងកុំលីលា	លូកលាន់ប៉ោបៀវាខូចខិល
លោភលន់លួចលាក់ធ្លាក់មន្ទិល	លិចលង់ខូចខិលគួរលះលែង ។
– វ អ៊ើយវវាងរឿងវិបត្តិ	វៀចវេរប្រយ័ត្នគេវាស់វែង
វានឹងវិលវល់យល់ទាស់ទែង	វឹកវរវង្វេងគេវាត់វិញ ។
– ស អ៊ើយសសួនស្ងួនសុខសាន្ត	ញាតិសរសើរប្រាណសាយសព្វពេញ
សន្សំសិក្សាសូត្រទន្ទេញ	សោកសៅទោម្នេញសឹងសូន្យសោះ ។
– ហ អ៊ើយហហាត់ឱ្យហំហួន	ហើយហាមមាសស្ងួនកុំហើរហោះ
ហួងហែងហួសហេតុអសុរស	ហិនហោចរបស់អស់ហ៊ឺហា ។
– ឡ អ៊ើយឡឡើងកុំឡប់ឡែ	ឡេះឡោះចែប្រែឡកឡូឡា
ឡឹកឡក់ឡេឡឺមិនធ្វើការ	លោកថាឡប់ឡិនមិនល្អឡើយ ។
– អ អ៊ើយអឱ្យចិត្តអង់អាច	កុំអាងអំណាចឥតកោះត្រើយ
អែបអបអញឯងក្រែងមិនស្បើយ	កុំអួតអ្នកអើយចេះឱនអត់ ។
– សាមអ៊ើយសិបបីតួនេះឯងហើយ	មាសស្ងួនកូនអើយលោកកំណត់
ប្រៀបបានប្រទីបពិតប្រាកដ	ភ្លឺច្បាស់បំផុតទាំងយប់ថ្ងៃ ។
– កូនអើយខំរៀនឱ្យសកម្ម	រៀនផ្សំផ្សែផ្សាំពិសោធន៍ច្នៃ
រៀនបូកគុណគូររៀនយប់ថ្ងៃ	រៀនកុំសំចៃរៀធ្វើការ ។
– រៀនបណ្តុះដាំដំណាំគ្រប់	រៀនកុំធុញថប់គ្រប់សញ្ញា
រៀនលីសែងរែកបែកប្រាជ្ញា	រៀនសព្វស្រែច្បាររៀនសាងសង់ ។
– រៀនគូរចាំងឆ្លាក់វិចិត្រករ	រៀនត្រាច់បើកបររៀនផ្ចិតផ្ចង់
រៀនសាងសីលទានរៀនស្មោះត្រង់	រៀនបំបាត់បង់នូវបាបកម្ម ។
-រៀនសរសេរស័ព្ទចាប់ចុងចួន	រៀនហាត់ពត់ខ្លួនជាប្រចាំ
រៀនសព្វកីឡាកាយវប្បកម្ម	រៀនតស៊ូទ្រាំរៀនរកស៊ី ។
– រៀនហើយរៀនទៀតរៀនសព្វមុខ	រៀនរកទំនុករៀនសំភី
រៀនរៀបរៀនរាប់គ្រប់នាទី	រៀនរួមសាមគ្គីរៀនសុចរិត ។
– រៀនហើយគង់ចេះតម្រេះបាន	រៀនចប់កល្យាណបានផលពិត
ចេះចាំជាថ្នាំដ៏ស័ក្តិសិទ្ធ	ចាស់ៗចូលចិត្តអ្នកចេះការ ។
– ចេះបានជាប្រាជ្ញជាបណ្ឌិត	ចេះបានជាព្រឹទ្ធជាគ្រូបា
ចេះដេកដើរស្តីពិចារណា	ចេះនាំអាត្មាយល់ផ្លូវល្អ ។
– ចេះជួសចេះជុលចេះធ្វើជាង	ចេះភ្លេងចេះច្រៀងសិល្បករ
ចេះច្បាប់វិន័យចេះសីលធម៌	ចេះសព្វអក្សរគ្រប់ភាសា ។
– កូនអើយឳពុកទុកបណ្តាំ	ចូរស្ងួនចំណាំរាល់រូបា
កុំរៀនវិជ្ជាក្រៅតម្រា	ជាអាទិ៍ស្រីស្រាល្បែងអបាយ ។
កុំរៀនធ្វើចោរចេះលួចឆក់	ចេះភរកុហកបោកប្រាស់ប្រាយ
ចេះហ៊ឺហាហួសឈ្មោះអន្តរាយ	ពុកផ្តាំឆោមឆាយកុំឱ្យរៀន ។
– កូនអើយចំណេះពិសេសផុត	នោះគឺប្រាកដចេះខ្មាស់អៀន
សូវខ្វះសម្បតិ្តទ្រព្យធនធាន	តែទ្រង់ខ្មាស់អៀនកុំខ្វះអី ។
– ឯឃ្លាមួយទៀតគួរនឹកភ្នក	មានមកពីរកលោកស្រដី
កុំស្ពឹកស្រពន់ស្ងួនប្រុសស្រី	ដេកដើរយបថ្ងៃរំពៃគិត ។
– បើរពិសដៃទើបផ្ទៃឆ្អែត	នោះជាបុព្វហេតុច្នៃប្រឌិត
ត្រូវស្នេហ៍កិច្ចការស្មើជីវិត	នោះទើបវរមិត្តពិតមានបាន ។
– ឧស្សាហ៍ព្យាយាមកុំទំនេរ	ប្រឹងប្រែងគ្នាន់គ្នេរគង់ស្រាកស្រាន្ត
របរសុចរិតឥតសាមាន្យ	បង់បោយមើលប្រាណស្មានកម្លាំង ។
– រកស៊ីផ្សែងផ្សំសន្សំទ្រព្យ	រិះរេឱ្យជាប់កុំឆុងឆាំង
កុំលោភលាភផលលើសកម្លាំង	ប្រមាណចានឆ្នាំងជាទម្លាប់ ។
– កុំដេកផ្សងព្រេងពឹងវាសនា	រង់ចាំទេវតាផ្តល់ភោគភ័ព្វ
សង្ឃឹមរាសីមមៃទ្រព្យ	សំណាងមិនគាប់អភ័ព្វខ្លួន ។
– ចង់ឆ្ងាញ់ខំស្វែងរកអន្លក់	ស្ទុះស្ទាកុំស្ទក់ទើបមាំមួន
ចង់ស្បើយកុំគិតនឿយហត់ខ្លួន	នោះជាច្បាប់ក្បួនលោកស្រដី ។
– ប្រឹងរកនាំមកនូវភោគផល	បើខ្វះខ្វាយខ្វល់នាំក្រក្រី
ទាល់ណាស់គាស់កាយធរណីដី	ម្ល៉េះគង់បានឆីខ្លួនរស់បាន ។
– មានជើងមានដៃសព្វទាំងទ្វេ	កុំសុំទានគេអាប់ឱនប្រាណ
សឹងស៊ីឈ្នួលគេក៏រស់បាន	កុំត្រាច់សព្វឋានសំពះគេ ។
– ចេះចាយឆោមឆាយត្រូវ ចេះរក	ពុកផ្តាំពន្លកស្ងួនមាសមេ
ក្រខ្សត់អត់ឃ្លានព្រោះទំនេរ	ទ្រព្យធនមានទ្វេព្រោះឧស្សាហ៍ ។
– ឃ្លានេះរិះគិតពិនិត្យចុះ	ចូរស្ងួនស្រីប្រុសពិចារណា
ចំណេះចេះបានពីសិក្សា	សម្បតិ្តទ្រព្យាបានពីរក ។
– ដូច្នេះពាក្យថាចេះពីរៀន	ជាដំបូន្មានត្រូវចាប់យក
ធនធានកើតមានព្រោះប្រឹងរក	ពន្លកគួរយកជាតម្រា ។
– សំណាងកូនណាស់កើតជាខែ្មរ	មិនថាក្រុងស្រែឬចំការ
ឱ្យតែមានចិត្តមានប្រាជ្ញា	មិនខ្វះមុខការប្រកបឡើយ ។
– ខ្លាចម្យ៉ាងតែខាងខ្ជិលទ្រមក់	ស្ពឹកស្រពន់ស្ទក់ធ្វើកន្តើយ
បើនឹងឧស្សាហ៍ព្យាយាមហើយ	ជីវិតនឹងស្បើយសល់ត្រើយសុខ ។
– ធម្មជាតិស្រុកយើងអំណោយផល	ទឹកដីយើងផ្តល់សម្បតិ្តស្តុក
កូនអើយខំរកកុំសំកុក	ក្តីសុខស្រណុកដ្បិតឧស្សាហ៍ ។
– នេះបទទំនុកឳពុកផ្តាំ	ពន្លកចូរចាំណាកូនណា
ពាក្យពុកផ្ញើទុកនឹងអក្ខរា	ផ្តល់ឱ្យធីតាសំណព្វចិត្ត ។
– កូនអើយវិជ្ជាជាទ្រព្យធន	ប្រាជ្ញាជាទុននៃគំនិត
កេរ្តិ៍ឈ្មោះជាយសនៃជីវិត	ន័យនេះគេងគិតកុំកន្តើយ ។
– ពាក្យពុកផ្តាំទុកប៉ុណ្ណេះហោង	បញ្ចប់ចងក្រងប៉ុណ្ណឹងហើយ
សូមស្ងួនសំរេចត្រាច់ដល់ត្រីយ	អនាគតស្បើយឃ្លាតទុក្ខភ័យ ។
– សូមជីវិតកូនភ្លឺត្រចះ	ដូចចួងច័ន្ទរះពេញបូរណ៍មី
ប្រសព្វសុខសាន្តប្រាណប្រិមប្រិយ៍	ប្រកបជោគជ័យតរៀងទៅ ។
– ពេលអត់ពីពុកកូនកុំភ្លេច	ពិនិត្យទឹកប៊ិចក្នុងសៀវភៅ
អក្ខរាចារចួនផ្ញើស្ងួនពៅ	ពេលពុកមិននៅត្រូវគេងគិត ៕