គោតមប្រវត្តិសូធ្យ

Posted on April 13, 2023August 5, 2024 by Johnny ចន្នី

ទស្សនាថ្ងៃនេះ: 22

សូធ្យគោតមប្រវត្តិ

ខ្ញុំសូមថ្វាយវន្ទា	ព្រះសាស្តាដ៏មានបុណ្យ
និងសូមគោរពគុណ	គ្រាព្រះអង្គចុះចាកឋាន ។
មកចាប់ផ្ទៃមាតា	ស្រីស្រឹង្គារស្រស់កល្យាណ
កាលនោះមហាជនបាន	សុខក្សេមក្សាន្តព្រោះបារមី ។
ក្នុងថ្ងៃព្រហស្បតិ៍អា-	សាឍមាសាពេញបូណ៌មី
រកាជាឆ្នាំថ្មី	សុខសិរីដល់ជនា ។
កាលបានដប់ខែហើយ	ព្រះគុណអើយកើតអស្ចារ្យ
នៅនាដងព្រឹក្សា	ឈ្មោះហៅថាព្រៃសាលវ័ន ។
កក្រើកផែនពសុធា	មានទេវតារាប់រយពាន់
ឋិតនៅក្នុងតំបន់	នៃឧទ្យានលុម្ពិនី ។
ឆ្នាំចពិសាខនា	ថ្ងៃសុក្រជាពេញបូណ៌មី
ថ្ងៃនោះព្រះជិនស្រី	ទ្រង់ប្រសូតឥតមានព្រួយ ។
កាលសិទ្ធត្ថក្សត្រា	មានវស្សាដប់ប្រាំមួយ
បិតាបានលើកស្ទួយ	អភិសេកនឹងស្រឹង្គារ ។
នារីស្រស់កល្យាណ	អ្នកផងបានស្គាល់គ្រប់គ្នា
ថាឈ្មោះនាងពិម្ពា	ស្រស់សោភាលើសលែងក្រៃ។
កាលនោះក្នុងឆ្នាំឆ្លូវ	ត្រូវថ្ងៃសៅរ៍មានសិរី
អាសាឍពេញបូណ៌មី	ក្សត្រាថ្លៃបានសុខា ។
ស្តេចមានព្រះរាជបុត្រ	បរិសុទ្ធភ័ក្ត្រស្រស់ថ្លា
គួរឱ្យព្រះរាជា	ស្តេចជំពាក់ចិត្តពេកក្រៃ ។
តែទ្រង់បានកាត់ផ្តាច់	ទ្រង់សម្រេចព្រះហឫទ័យ
ថាត្រូវកាត់អាល័យ	ពីបុត្រថ្លៃមួយគ្រាណា ។
បើបិតាបានត្រាស់	វិលរហ័សរកបុត្រា
មកប្រោសស្ងួនពុំងារ	ចាកសង្សារណាបុត្រថ្លៃ ។
កាលនោះថ្ងៃព្រហស្បតិ៍	ក្នុងឆ្នាំថោះមានសិរី
អាសាឍពេញបូណ៌មី	ក្សត្រាថ្លៃចេញបព្វជ្ជា ។
កាលបានបព្វជ្ជាហើយ	មិនព្រងើយខំឧស្សាហ៍
ធ្វើទុក្ករកិរិយា	គ្មាននរណាធ្វើដូចអី ។
បានត្រាស់ឆ្នាំរកា	ពិសាខាពុធបុណ្ណមី
ជាថ្ងៃព្រះជិនស្រី	មានសិរីឈ្នះក្រុងមារ ។
ត្រាស់ដឹងបានពីរខែ	ទ្រង់គ្នាន់គ្នេរប្រោសទេសនា
ប្រោសបញ្ចវគ្គិយា	នាកណ្តាលដងព្រឹក្សព្រៃ ។
គឺក្នុងឆ្នាំរកា	អាសាឍមាសាបុណ្ណមី
ថ្ងៃសៅរ៍ព្រះជិនស្រី	ផ្តើមពោលស្តីធម៌ទេសនា ។
ក៏ជាថ្ងៃកំណើត	សង្ឃបានកើតក្នុងលោកា
សាវ័កព្រះសាស្តា	មានរហូតដល់សព្វថ្ងៃ ។
នាថ្ងៃមួយនោះណា	គួរសោកាណាស់ម្ចាស់ថ្លៃ
គឺថ្ងៃព្រះជិនស្រី	កាត់ព្រះទ័យដាក់សង្ខារ ។
គឺក្នុងថ្ងៃអាទិត្យ	ឆ្នាំម្សាញ់ពិតមាឃមាសា
នៅចំពោះមុខមារ	នាបាវាលចេតិយ ។
បីខែកន្លងទៅ	មិនឈប់នៅយឺតយូរអី
ដល់ថ្ងៃព្រះជិនស្រី	ទ្រង់និព្វានចាកលោកា ។
គឺក្នុងឆ្នាំនោះឯង	មានការផ្សេងតែមាសា
គឺខែពិសាខនា	ថ្ងៃអង្គារពេញបូណ៌មី ។
ដោយអំណាចអានុភាព	ដែលខ្ញុំក្រាបថ្វាយវន្ទីយ៍
នឹកគុណព្រះមុនី	សូត្រប្រវត្តិព្រះសាស្តា ។
សូមឱ្យសម្រេចបុណ្យ	ដែលជាគុណល្អថ្លៃថ្លា
អន្ទោលក្នុងសង្សារ	សូមប្រាថ្នាជួបបណ្ឌិត ។
សូមជួបព្រះសិអារ្យ	ជាសាស្តាដ៏ពិសិដ្ឋ
សូមចាក់ធ្លុះធម៌ពិត	សមដូចចិត្តប្រាថ្នាហោង ៕