កតញ្ញុតា

Posted on January 13, 2018November 10, 2024 by Johnny ចន្នី

ទស្សនាថ្ងៃនេះ: 15

កតញ្ញុតា

ភាវៈនៃអ្នកដឹងគុណ

បទកាកគតិ

កតញ្ញុតា	មានន័យប្រាប់ថា	ជនកតញ្ញូ
ត្រូវតែប្រព្រឹត្ត	តាមបែបគំរូ	ដែលព្រះជាគ្រូ
	ប្រាប់ឱ្យតបគុណ ។
មាតាបិតា	គ្រូឧបជ្ឈាយ៍	សុទ្ធតែស្រែបុណ្យ
ជនណាក៏ដោយ	ដែលគេមានគុណ	ក៏ជាស្រែបុណ្យ
	ដែលត្រូវសាបព្រោះ ។
បណ្តុះពូជបុណ្យ	ក្នុងស្រែជាគុណ	វកុំឱ្យមានមោះ
បុណ្យនឹងកើតកើន	ចម្រើនឥតខ្ចោះ	ត្រូវមានចិត្តស្មោះ
	កុំលុបគុណចោល ។
កុំគ្រាន់តែថា	មាតាបិតា	មានគុណជាគោល
មាត់ថាត្រូវតប	គុណកុំច្បោលៗ	ធ្វើដែរស្រោលៗ
	សោះតែគេថា ។
ជនអ្នកតបគុណ	ព្រះពុទ្ធមានបុណ្យ	ទ្រង់ត្រាស់ទេស្នា
សរសើរញឹកញយ	មានក្នុងសាស្ត្រា	គម្ពីរដីកា
	គួរយើងចងចាំ ។
ចេះចាំហើយធ្វើ	ដោយចិត្តអើពើ	ឱ្យស៊ប់ឱ្យស៊ាំ
ឱ្យស្និទ្ធនឹងគុណ	គុណតែងថែទាំ	ពុំមែនខ្ទេចខ្ទាំ
	ព្រោះតបគុណទេ ។
ជនមានចិត្តខ្សោយ	ច្រើនតែធ្វេសធ្លោយ	រមិលគុណគេ
អាងព្រេងសំណាង	ពីក្នុងបុព្វេ	ប្រហែសធ្វេសទ្វេ
	ព្រងើយកន្តើយ ។
អ្នកប្រាជ្ញប្រាប់ថា	ជនប្រុសស្រីណា	លុបគុណចោលហើយ
ជនប្រុសស្រីនោះ	ពុំមានសុខស្បើយ	យូរប៉ុន្មានឡើយ
	រែងតែធ្លាក់ខ្លួន ។
កំពុងបានសុខ	ស្រាប់តែមានទុក្ខ	ចេញមុខផ្ទួនៗ
ឱ្យផលកំណាច	ឃោរឃៅឥតស្ងួន	ទោសមកពីខ្លួន
	រមិលគុណគេ ។
ទេព្តោគខឹង	ព្រោះខ្លួនរឹងត្អឹង	អាងបុណ្យបុព្វេ
ទោសបច្ចុប្បន្ន	ជិះជាន់ឥតល្ហែ	ភ័ព្វព្រេងបុព្វេ
	បើមានក៏ផ្អាក ។
ទោសរមិលគុណ	រារាំងមុខបុណ្យ	ព្រេងឱ្យសម្រាក
បង្អង់ឈប់សិន	បាបថ្មីវិបាក	ឱ្យផលឥតស្រាក
	ព្រោះបានឱកាស ។
បុណ្យបាបចាស់ថ្មី	តែងតែរំពៃ	ពុំមែនផ្តេសផ្តាស
កាលមានចន្លោះ	ត្រូវពេលសស៊្រាស	ហាក់ដូចប្រកាស
	ប្រាប់ថាត្រូវអញ ។
ចេញមុខផ្តល់ផល	សុខទុក្ខឱ្យដល់	ជនដែលកកាញ់
កសាងបង្កើត	កំណើតជាអញ	អញជាសម្លាញ់
	ត្រូវអញបានផល ។
រីបុណ្យឬបាប	ដែលមានសភាព	ជាកម្មតែងផ្តល់
សុខទុក្ខឱ្យជន	អ្នកធ្វើឱ្យដល់	នូវក្តីសល់វ៉ល់
	ឬក្តីសុខសាន្ត ។
បាបតែងរារាំង	បុណ្យឱ្យនៅគាំង	ផ្អាកសិនពុំបាន
ចេញមុខឱ្យផល	ជាសុខសម្រាន្ត	អ្នកធ្វើតែងបាន
	ទទួលរងទុក្ខ ។
បុណ្យក៏រារាំង	បាបឱ្យនៅគាំង	ផ្អាកពុំចេញមុខ
ព្រោះមានឱកាស	បុណ្យផ្តល់ក្តីសុខ	សុទ្ធតែមានមុខ
	ទីទៃពីគ្នា ។
ហេតុនោះគួរជន	កុំនៅទម្រន់	ក្នុងក្តីខ្ជីខ្ជា
គួរកសាងបុណ្យ	មានគុណមហិមា	ទើបបានឈ្មោះថា
	អ្នកស្រឡាញ់ខ្លួន ៕